شارپرێس:
لەنێوان دەسەڵاتی تەکنیکیی بانکی ناوەندییو بڕیاری سیاسیی پەرلەماندا، نزار ناسر حسێن پارێزگاری بانکی ناوەندیی عێراق، پەردەی لەسەر چەندین دۆسیەی هەستیاری دارایی لادەبات؛ لەپرسی سڕینەوەی سفرەکانو گۆڕینی دراوەوە تا دەگاتە کۆتاییهاتنی سەردەمی سزاکانو قەبارەی ئەو پارەیەی کە لەعێراقدا چاپکراوە.
سڕینەوەی سفرەکان؛ لەگیرفانی پەرلەماندایە
پارێزگاری بانکی ناوەندیی بەڕونی جیاوازیی لەنێوان دوو پڕۆسەی گرنگدا کرد؛ ڕایگەیاند کە "گۆڕینی شێوەو دیزاینی دراو" یان چاپکردنی چاپی نوێ، بەتەواوی لەدەسەڵاتی بانکی ناوەندیدایەو دەتوانن بڕیاری لێبدەن، بەڵام سەبارەت بە"سڕینەوەی سفرەکان" جەختیکردەوە، ئەم هەنگاوە تەنها کارێکی هونەری نییە، بەڵکو پێویستی بەدەرکردنی یاسای تایبەت هەیە لەناو پهرلهمانى عێراق.
107 ترلیۆن دینار؛ پارەی چاپکراوی عێراق چەندە؟
لەئامارێکی چاوەڕواننەکراودا، نزار ناسر ئاشکرایکرد، قەبارەی ئەو پارەیەی کە بانکی ناوەندی چاپیکردوەو دەریکردوە، گەیشتوەتە 107 ترلیۆن دینار، بەڵام ئەوەی جێگەی تێڕامانە، تەنها 40 ترلیۆن دینار لەبازاڕەکاندا دەستاودەستی پێدەکرێت، ئەمەش ئاماژەیە بۆ ئەوەی بڕێکی یەکجار زۆری دراوی عێراقی لەدەرەوەی سیستەمی بانکیو لەماڵەکاندا کۆکراوەتەوە.
ماڵئاوایی لە"سزای نێودەوڵەتی"
لەپەیامێکی دڵنیاکەرەوەدا بۆ کەرتی بانکی، پارێزگاری بانکەکە ڕایگەیاند، چاکسازییەکان بەهەماهەنگی لەگەڵ کۆمپانیا جیهانییەکان (ئۆلیڤەر وایمان) ئەنجامیان هەبوەو "لەمەودوا چیتر هیچ سزایەکی نێودەوڵەتی بەرامبەر بانکە عێراقییەکان نابینرێت"، هەروەها ئاماژەی بەوەشکرد، حهوت بانکی نوێ بەمزوانە دەستدەکەن بەمامەڵەکردن بەدراوە جیهانییەکانی دیكه (جگە لەدۆلار)، ئەمەش گوشار لەسەر بازاڕی دۆلار کەمدەکاتەوە.
بۆچی عێراق لەئەمریکا وەبەرهێنان دەکات؟
سەبارەت بەڕەخنەکان لەسەر دانانی یەدەگی دارایی عێراق لەئەمریکا، پارێزگار وتی، "ئەمریکا تەنها پەناگەی ئارامە بۆ پارەکانی عێراقو تەنها وڵاتیشە کە (پارێزبەندیی یاسایی) بەپارەکانی عێراق بەخشیوە"، هۆشداریشیدا کە وەبەرهێنان لەوڵاتانی دیكه مەترسیی دەستبەسەرداگرتنی لێدەکرێت.
ئاڕاستەی نوێ؛ فکری کەرتی تایبەت
لەکۆتاییدا، پارێزگاری بانکی ناوەندیی ئاماژەی بەوەکرد، حکومەتی ئێستا بەفەلسەفەی کەرتی تایبەت کاردەکات، هەربۆیە پلانیان هەیە بۆ دەسپێشخەریی نوێو پێدانی قەرزی گەورە بەو پڕۆژە زیندوانەی کە دەبنە هۆی بوژانەوەی ژێرخانی ئابوریی وڵات.
