شارپرێس:
هۆشدارییەکانی هەواڵگریی ئەمریکا ئاماژە بەوە دەکەن کە پلانی ئێران بۆ کوشتنی بەرپرسان و دیپلۆماتکارانی ئەمریکی گەیشتۆتە قۆناغی پێشکەوتوو، لە کاتێکدا نیگەرانییەکان لە فراوانبوونەوەی ملمڵانێ ناوچەییەکان و دەستپێکردنەوەی هێرشەکان بۆ سەر ئێران زیاد دەکەن.

بەپێی ڕاپۆرتێکی ڕۆژنامەی "نیویۆرک تایمز"، دوو بەرپرسی ئێرانی، کە یەکێکیان بەرپرسیارێکی باڵای سوپای پاسدارانە، وتوویانە تاران خۆی بۆ ئامانجگرتنی دیپلۆماتکاران و بەرپرسانی ئیدارەی ئەمریکا ئامادە دەکات. بە وتەی ئەوان، کوژرانی دەیان بەرپرسی ئێرانی و ژمارەیەک لە ئەندامانی خێزانەکانیان لە هێرشەکانی ئەمریکا و ئیسرائیلدا، ئەمریکییەکانی کردووەتە "ئامانجی ڕەوا" لە دیدی تارانەوە.

باراک ڕافید، ڕۆژنامەنووسی کەناڵی 12ی ئیسرائیل لە واشنتۆن، لە کۆتایی هەفتەدا ئاشکرای کرد کە هەواڵگریی ئەمریکا هۆشداریی داوە ئێران بە شێوەیەکی بەرچاو هەوڵەکانی بۆ بەئامانجگرتنی دیپلۆماتکاران و بەرپرسانی ئەمریکایی لە ڕۆژهەڵاتی ناوەڕاست و ناوچەکانی دیکەی جیهان چڕتر کردۆتەوە.

بەپێی ڕاپۆرتەکە، ئەو هۆشدارییانە لە یادداشتێکدا بۆ مارکۆ ڕوبیۆ، وەزیری دەرەوەی ئەمریکا، نێردراون. هەندێک بەرپرسی ئەمریکی وتوویانە زانیارییە هەواڵگرییەکان سەبارەت بە پلانەکانی ئێران، یەکێک بووە لە هۆکارەکانی داواکردنی وەزارەتی دەرەوە لە ئەندامانی خێزانی دیپلۆماتکاران و کارمەندانی ناپێویست لە باڵیۆزخانەکانی ئەمریکا لە ڕۆژهەڵاتی ناوەڕاست، بۆ ئەوەی ناوچەکە بەجێبهێڵن.

جەی کلایتۆن، بەرپرسی هەواڵگریی نیشتمانیی ئەمریکا، لە یادداشتێکی یەک لاپەڕەییدا پێشنیاری کردووە ئاستی نهێنیبوونی زانیارییە هەستیارەکان تا ئەو جێیەی دەکرێت کەم بکرێتەوە، بۆ ئەوەی ڕوبیۆ بتوانێت ئەو زانیارییانە لەگەڵ ژمارەیەکی زیاتر لە کارمەندانی ئەمریکی هاوبەش بکات کە لە مەترسیدان. بەڵام یادداشتەکە ناوی ئامانجەکان، وڵاتەکان یان وردەکارییەکانی پلانەکان ئاشکرا نەکردووە.

تا ئێستاش، هیچ پشتڕاستکردنەوەیەکی سەربەخۆی ئاشکرا سەبارەت بە ئەنجامدانی پلانێکی دیاریکراوی تیرۆرکردن بڵاونەکراوەتەوە.