شارپرێس:

بەپێی راپۆرتێک کە ناوەندی توێژینەوەی ئەمەریکی "Pew" ئامادەی کردووە، ئایینی مەسیحی کە ئێستا زۆرینەی کۆمەڵگەی ویلایەتە یەکگرتووەکانی ئەمەریکا پێکدەهێنێت، تاوەکو ساڵی 2070 بەشێوەیەکی بەرچاو کەمدەکات و تەنیا سێیەکی دانیشتووانی ئەو وڵاتە پێکدەهێنێت.

راپۆرتەکە دەڵێت: ئەگەر ئەو "گۆڕانکارییە ئاینییە"ی ئێستا هەیە هەر بەو جۆرە بەردەوام بێت، ئەوە لەمساوەی 48 ساڵی داهاتوودا، لەسەدا 52ی ئەمەریکاییەکان دەبنە بێ ئایین و ڕێژەی مەیسحییەکان بۆ لەسەدا 35 کەمدەبێتەوە.

پێشبینی ئەوەشکراوە کە هەر لەو ماوەیەدا ژمارەی ئەو ئەمەریکییانەی خۆیان وەک مسووڵمان و جولەکە و هیندۆس و بودیی و پەیڕەوی ئاینییەکانی تر دەناسێنن، چەندقات زیاد بکات.

جێگای ئاماژەیە کە لە ساڵی 2020دا دیمۆگرافیای ئایینی لە ئەمریکا بەم شێوەیە بووە:64٪ مەسیحین، 30٪ "سەر بە هیچ ئایینێک نین"، 6٪ی دیکەش بەسەر جولەکە و موسڵمانان و هیندۆس و بوداییەکاندا دابەشکراون.

ڕاپۆرتەکە لەسەر بنەمای کۆمەڵێک هۆکارنووسراوە، لەوانە ڕێژەی لەدایکبوون، شێوازی کۆچکردن، هۆکاری دیمۆگرافی لەوانە تەمەن، ڕەگەز و دۆخی ئایینی ئێستا. هەروەک فاکتەری تری چۆنییەتی گواستنەوەی ئایین لە نەوەیەکەوە بۆ نەوەیەکی تر و چۆنێتی گۆڕینی ئایینەکانی خەڵک بە تایبەت مەسیحییەکان کە بوونە بێ ئایین، کە لەم ساڵانەی دواییدا ژمارەیان زیادی کردووە، لەبەرچاوگیراوە.
ئامادەکردن: ئاکۆ ئاڵی