شارپرێس:
هێزە ئەمنییەکانی تورکیا 47 هاوڵاتی
کوردیان لە شاری ئامەد دەستگیرکرد بەهۆی ئەوەی بەشدارییان لەگردبوونەوەیەکی
نارەزایەتیی دژ بە هێرشە ئاسمانییەکانی ئەو وڵاتە بۆسەر خاکی هەرێمی کوردستان و
رۆژئاوای کوردستان کردبوو.
میدیاکانی تورکیا بڵاویانکردۆتەوە کە هێزە ئەمنییەکانی تورکیا دەستیان کردووە
بەدەستگیرکردنی ئەو کەسانەی بەشدارییان لە گردبوونەوەی نارەزایەتیی دژ بە
هێرشەکانی تورکیا بۆسەر خاکی هەرێمی کوردستان و رۆژئاوای کوردستان کردووە، کە
ژمارەی دەستگیرکراوەکان گەیشتۆتە 47 کەس لەناویاندا
زیاد جەیلان و خاتوو سیڤاڵ گۆڵمازی هاسەرۆکانی لقی پارتی دیموکراتی گەلان (هەدەپە)
لە ئامەد.
دوێنێ سێشەممە، دەیان کەس لە هاوڵاتیانی شاری ئامەد و پەڕلەمانتار و ئەندام
و لایەنگرانی هەدەپە لە شارۆچکەی یەنی شەهیری سەر بە ئامەد گردبوونەوەیەکی
ناڕەزایەتییان دژ بە هێرشەکانی تورکیا بۆسەر باشوور و رۆژئاوای کوردستان ئەنجامدا،
بەڵام هێزەکانی پۆلیس هەوڵیاندا بەزەبری هێز بڵاوە بە بەشداربووانی گربوونەوەکە
بکەن و ڕێگرییان لێکردن کۆنگرەی رۆژنامەوانیی ئەنجام بدەن.
لە 20ی ئەم مانگەوە تورکیا لەڕێگای دەیان فڕۆکەی
جەنگیی و فڕۆکەی بێفڕۆکەوانەوە دەستیکردووە بە هێرشەکردنە سەر ناوچە جیاجیاکانی
رۆژئاوای کوردستان و باشووری کوردستان، کە بەهۆیەوە دەیان کەس بوونەتە قوربانیی،
سەرۆکی تورکیاش لەنوێترین لێدوانیدا رایگەیاند کە ئەگەری هەیە هێرشی وشکانیش بکەنە
سەر رۆژئاوای کوردستان.
ئامادەکردن: ئاکۆ ئاڵی