ئەی شارەكەم سولەیمانی

مەلەفی تایبەت

14/11/2023‌ 700 جار خوێندراوه‌ته‌وه

حسێن عەزیز

ئەی شاری ڕۆشنبیریی و شۆڕشگێڕی
ئەی شاری هەڵمەت و قوربانی
ئەی شاری شۆڕش و شەهیدان
خۆشمدەوێی، چونكه لە شارەكەی دڵ و گیانمدا:

یەكەمین چاپخانه لە باشووری (كوردستان)‌ دامەزرا.
یەكەمین ڕۆژنامەی كوردی دەرچوو.
یەكەمین جار لە مێژوودا، خوێندن بە كوردی دەسیپێكرد.
یەكەمین جار لە مێژوودا، قەلاچۆكردنی نەخوێندەواری، لە (زانستی كوردان) بوو.
یەكەمین قوتابخانەی سەربازیی (ڕووشدییەی عەسكەری) كرایەوە.
یەكەمین زانكۆ لە باشووری (كوردستان) درووستبوو.
یەكەمین سروودی كوردی گوترا.
یەكەمین قەوانی كوردی، بە دەنگی هونەرمەندێكی گۆانیبێژی دەنخۆشی (سولەیمانی) تۆماركرا‌.
یەكەمین جار لە مێژوودا، بزووتنەوەی شانۆگەری سەریهەڵدا.
یەكەمین شۆڕشی چەكداری نەتەوەیی بەرپابوو.
یەكەمین ڕاپەڕینی خوێناوی ڕۆژی (6. 9. 1930)، لەبەردەركی سەرای (سولەیمانی) ڕوویدا.
یەكەمین دەسەڵاتی كوردی دامەزرا.
یەكەمین پایتەختی باشووری (كوردستان) بوو.
یەكەمین حوكمداری (كوردستان)، ڕەوانشاد (شێخ مەحموودی حەفید)، لە (سولەیمانی) فەرمانڕەواییكرد.
یەكەمین ڕێكخراوی دێمۆكراسی، پارتی ڕامیاری ئاشكرا و نهێنیی دامەزران.
یەكەمین و یەكەمین و گەلێ یەكەمینی دیكەش، هەر لە شاری (سولەیمانی) بوون.

بۆیە دەڵێم:
(سولەیمانی)، ئەی دڵی زیندووی (كوردستان)ەكەم! هەموو ڕۆڵەكانی نەتەوەی كورد، چاویان لە تۆیە، نائومێدیان نەكەی، وەك سەركردەی پارتەكان نائومێدیانكردووی!

(سولەیمانی)، ئەوڕۆ (239) ساڵ، بەسەر دامەزراندنی تۆی پارچەیە لە دڵ و گیانی شیرینمدا تێپەڕدەبێ.‌ لەبەرئەوە ڕۆژی (14. 11)ی هەموو ساڵێ، بە جێژنی لەدایكبوونی خۆم دەزانم، چونكە ئێمە پێكەوە لەدایكبووین، ڕۆڵەی یەك دایكی‌ بەسۆز، بە ئەمەك و بەشمەینەتی (كوردستان)ین، جێژنی لەدایكبوونمان پیرۆزبێ!

(سولەیمانی)، لە ئەم یادە پیرۆزەدا، یەكبەیەك هەموو خڕەبەردێكی نێوكۆڵانەكانت ماچدەكەم. هەموو گەردیلەیەكی خۆڵە پیرۆزەكەی، سەرمەزارگەی پیاوچاكان و نیشتمانپەروەرانت دەلێسمەوە. تاجەگوڵینەی خۆشەویستیی و ئەمەكداری، لەسەر گۆڕی سەربازە گومناوەكانت دادەنێم. چەپكێ گوڵی خوێناوی ڕازاوەی ڕەنگاوڕەنگ، بۆنخۆشتر لە هەڵاڵە، بەیبوون و ڕیحانەكێویلە، لە باخەكەی سەرا دەچنم و لە دامێنی ئارامگەكەی (شێخ مەحموود)ی نەمری دەدەم. ئەو شێخەی ڕەنگوڕووی بیری ئازادیی و سەربەخۆی، لە باشووری نیشتمانەكەمدا ڕشت، بەردی بناغەی یەكەمین دەسەڵاتی كوردی دانا و ئاڵای ڕەنگینی لەخوێنهەڵكێشراوی (كوردستان)ی هەڵكرد!

(سولەیمانی)، مشتێ تۆوی چەندین گوڵی جوانی ڕەنگین و ڕیحانە‌ڕەشەی بۆنخۆش، لەسەر مەزارە پیرۆزەكەی یەكەمین خەمخواری نیشتمان و كورد‌پەر‌وەر، فەیلەسووف و نووسەر، شای هۆنەران و ڕۆژنامەنووسی كورد (پیرەمێرد) دەچێنم. ئەو (پیرەمێرد)ەی، وازی لە ژیانی ئاوارەیی و دوورەوڵاتی هێنا، بۆ نیشتمانە بندەسە كاولبووەكەی خۆی گەڕایەوە، شەو و ڕۆژی پێكەوە دادروو، تا لە ژیاندا بوو، لە قەلەندەرخانەكەی خۆی، ڕاژەی زمان و وێژە، كورد و (كوردستان)ی كرد!

(سولەیمانی)، سەری ڕێز و نەوازش، بۆ (عەولەسیسی بوێر، هەڵۆ بەگی كوردپەروەر، ئەختەری ژنەشۆڕشگێڕ) و هەزاران قۆچی قوربانی دیكەی ڕیی ڕزگاریی و سەربەخۆیی كورد و (كوردستان) دادەنەوێنم!

(سولەیمانی)، ئەی ئەو شارەی، بە پایتەختی لەدایكبووی، لە كانگەی قووڵایی دڵ و هەستێكی خاوێنی كوردپەروەرانەوە، خۆشمدەوێی. لای من لە هەموو شارێكی دیكەی ئەم جیهانه جوانتری‌، لە هەموو شارێكی دیكەی ئەم جیهانەش، پتر خۆشمدەوێی. (خۆڵ و خاشاكی كۆڵانەكانت، بە گەنجی قاروون نادەم. چونكە بە دڵ هۆگری تۆ بووم و بێ تۆ ناژیم). هەر وەك خوالێخۆشبووش (جەمال ئاغا) گوتوویەتی:

بەهەشتی زاتی پاكی خوا، بەناوبانگە لەبەر جوانی
كوتومت ڕەنگی ڕێژراوە، لەسەر شێوەی سولەیمانی

بەڵام ئەی شارەكەم!
زۆر بە داخەوە، گوورگە هارە چاو برسییەكان، كەڵبەی ژاراوی تیژییان، لە جەستەت گیركردووە. چونكە نەك هەر خەڵكێكی زۆر، لە هەموو نێوچە و شارەكانی (كوردستان)ەوە، ڕوویان تێكردووی، بەڵكوو لە هەر چوار دەوڵەتە داگیركەرەكەی نیشتمانەكەشمانەوە هاتوون، لە شارەكەماندا دەژین و جێگیربوون. لەبەرئەوە چەندین كەلتووری جیاواز تێكەڵابووه و ئەوانەی شاریش بەڕێوەدەبن، زۆربەیان خەڵكی (سولەیمانی) نین، بۆیە وامان بەسەرهاتووە! گەر كاریش وا بڕوا، ڕۆژبەڕۆژ شارەكەمان، بەرەو دواوە دەڕوا. بۆیە ئەو شارە ڕازاوەیەی جاران نەماوی. هەر وەك (داناز)ی هۆنەریش دەڵێ:

هەموو شەوێ، یادەكانی بەناو دڵمدا دیت و دەچێ
بەڵام سەد ئاخ سلێمانی، قەت لە جاری جاران ناچێ