دوو دڵ لەیەک جەستەدا.. چیرۆکی هاوسەرگیری دوانەیەکی بەیەکەوەلکاو لە ئەمریکا

هەمەڕەنگ

29/03/2024‌ 1394 جار خوێندراوه‌ته‌وه

لە جیهانێکدا کە ڕۆتین و باوگەری زاڵن بەسەریدا، چیرۆکی ئەبی و بریتنی هێنسێل وەک تیشکێکی ئومێد دەدرەوشێتەوە کە ڕێگای ناوازەیی و داهێنان ڕۆشن دەکاتەوە، ئەم خوشکە دووانانەی پەیوەست بوون بە یەک جەستەوە ڕێگەیان نەدا کەمئەندامی جەستەییە ناوازەکەیان ئاواتەکانیان سنووردار بکەن، بە پێچەوانەوە تەحەددیاتەکانیان کردە دەرفەتی گەشەکردن و پێشکەوتن، نیشاندانی مانای ئیرادە و ئیرادەی ڕاستەقینە بە جیهان.

ئەبی و بریتنی لە دوانە بەناوبانگەکانی جیهانن، هەریەکەیان سەر و دڵی جیاوازیان هەیە، بەڵام جەستەیان یەکگرتووە و قاچ و قۆڵیان هاوبەشە.

لە ساڵی 2021، ئەبی هێنسێل، ئەو کچە تەمەن 34 ساڵەی کە شانبەشانی خوشکە دووانەکەی بریتنی ناوبانگێکی زۆری بەدەستهێنا کاتێک لە ساڵی 1996 لە بەرنامەی The Oprah Winfrey Show دەرکەوتن، هاوسەرگیری لەگەڵ جۆش بۆلینگ کردووە، کە پەرستار و سەربازێکی دێرینە لە سوپای ئەمریکا، هەرچەندە بڕیاریاندابوو کە ئەم رووداوە بەشاراوەیی بهێڵنەوە، بەڵام وێنەی هاوسەرگرییەکەیان لە تۆڕە کۆمەڵایەتییەکاندا بڵاوکردەوە.

وێنەی پڕۆفایلی فەیسبووکەکەیان بەشێک لە ئاهەنگی هاوسەرگیریەکەیان دەردەخات، دوانە بەیەکەوەلکاوەکە جلی بووکێنی سپییان لەبەردایە، بۆلینگ بە قاتێکی خۆڵەمێشی لەبەردەمیان وەستاوە و دەستیان دەگرێت.

بەپێی هەواڵێکی ماڵپەڕی "تودەی"، ئەبی و بریتنی لە ئێستادا مامۆستای بیرکاری پۆلی پێنجەمن و لە ویلایەتی مینیسوتا نیشتەجێن و لەوێ لەدایک بوون و گەورەبوون، هەروەها لە پڕۆفایلی بۆولینگ لە تۆڕی کۆمەڵایەتی فەیسبووک وێنەی ئەو خوشکانە دەرکەوتووە کە ئایسکرێم دەخۆن و بە خۆشی پێکەوە گەشت دەکەن.

ئابی و بریتنی هێنسێل حاڵەتێکی دەگمەنن کە دووانەکان بە دوو سەر لەسەر جەستەیەک بەیەکەوە دەبەسترێنەوە، دیاردەیەک کە پێی دەوترێت دوانەی نیمچە جیاکراوە کە دوو سەر لە تەنیشت یەکەوەن لەسەر جەستەیەک، دوو خوشکەکە سوڕی خوێنیان هاوبەشە و هەموو ئەندامەکانی ژێر کەمەریان هەیە.

کاتێک ئەبی و بریتنی لە ساڵی 1990 لەدایک بوون، دایک و باوکیان بە ناوەکانی پاتی و مایک هێنسێل بڕیاریان دا نەشتەرگەری جیابوونەوەی  مەترسیداریان بۆ بکەن، لەو کاتەدا پزیشکەکان وتویانە ئەگەری ڕزگاربوون لە هەردووکیان لە نەشتەرگەرییەکە کەم بووە.
 

ئابی کۆنترۆڵی قۆڵ و قاچی ڕاستی دەکات، لە کاتێکدا بریتنی کۆنترۆڵی لای چەپی دەکات و سەرەڕای ئاستەنگە جەستەییە بەرچاوەکانیان، ئەمەش نەبووەتە هۆی خاویان لە گەیشتن بە ئامانجە گرنگەکانی وەک دەرچوون لە تاقیکردنەوەی مۆڵەتی شۆفێری لە تەمەنی 16 ساڵیدا، دەرچوون لە کۆلێژ، گەشتکردن بۆ ئەوروپا، و لە کۆتاییدا بوون بە مامۆستا.

ئابی و جۆش ژیانی هاوسەرگیرییەکەیان لە چاوی خەڵک شاردەوە تا ساڵی 2023، کاتێک وێنەی هاوسەرگیریەکەیان لە ئەکاونتی تیک تۆک بڵاوکردەوە

چیرۆکی ئەبی و بریتنی هێنسێل ڕۆحی مرۆڤایەتی بە مانا بەرزەکەیەوە بەرجەستە دەکات. ئەم دوو ژنە هەرگیز تەسلیمی ئەو بارودۆخە سەختە نەبوون کە ڕووبەڕوویان بووەوە، بەڵکو تەحەدای بەربەستەکانیان کرد و دەستکەوتی سەرنجڕاکێشیان بەدەستهێنا.

ئەوان وانەیەکی ئیلهامبەخشن بۆ هەمووان کە ژیان تەنها هەلومەرج نییە، بەڵکو ویست و ئیرادە و سووربوونە بۆ گەشەکردن سەرەڕای ئاڵنگاریەکان و چیرۆکەکەیان بەردەوام دەبێت لە ئیلهامبەخشین بۆ نەوەکانی داهاتوو کە ریزپەڕبوون و جیاوازیی بەربەست نییە، بەڵکو دەرفەتێکە بۆ درەوشاوەیی و نایابی .

ئامادەکردن: ئاکۆ ئاڵی