شارپرێس:
فڕۆكە جەنگییەكانی ئیسرائیل كەمێك لەمەوبەر هێرشێكی بەرفراوانیان لە شاری تارانی پایتەختی ئێران دەستپێكردو لە هەموو لایەكەوە دووكەڵ بەرز دەبێتەوە.
بەگوێرەی سەرچاوە نێوخۆییەكان لە تارانەوە هێرشی فڕۆكە جەنگی و درۆنەكانی ئیسرائیل چەند ناوچەی هەستیاری گرتووەتەوە و چەندین شوێن بۆردومان كراون.
هێرشەكان چەندین شوێنیان لەنزیك مەیدانی ئازادی و فڕۆكەخانەی ناوخۆیی شارەكە، شەقامی وەلی عەسر گرتووەتەوە.
هەروەها هێرشەكان وەزارەتی ناوخۆ، بارەگای هێزی ئاسمانی و بنكەكانی پۆلیس و چەند شوێنێكی دیكەی لە رۆژئاوا و رۆژهەڵات و باكوری تاران گرتووەتەوە و ئاگری كۆگای سوتەمەنی تارانیش كە شەوی رابردوو بۆردومان كرا تا ئێستا نەكوژاوەتەوە.
لە ئاسمانی تارانی پایتەخت بەبەردەوامی دەنگی فڕۆكە و بۆردومان دەبیسترێت و سیستمی بەرگری ئاسمانی چالاككراوە.
لەلایەكی دیكەوە هێرشەكانی ئیسرائیل لە شارەكانی كرماشان، تەورێز، ئەسفەهان و ئەهواز بەردەوامن و چەندین پێگەی بۆردوومان كراون.
ئ.ه