شارپرێس:
لیژنەی سوتەمەنی دەربەندیخان لەئاگاداركردنەوەیەكدا بۆ هاوڵاتیانی ناوچەكە دەڵێت، سبەینێ نەوت بەسەر دانیشتوانی قەزای دەربەندیخان دابەشدەكرێت.
لیژنەی سوتەمەنی لەقایمقامیەتی قەزای دەربەندیخان لەئاگادارییەكدا بڵاویكردەوە، سبەینێ چوارشەممە 19-11-2025، دەستدەكرێت بەدابەشكردنی نەوتی سپی بەسەر هاوڵاتیانی قەزاكە، پڕۆسەی دابەشكردنەكەش لەڕێگەی عەدادەوە دەبێت و تەنكەری تایبەتیش بۆ هەریەك لە ناحیەی باوەخۆشێن و گەڕەكی سیروان دابین دەكرێت.
لەئاگادارییەكەدا داوا لەهاوڵاتیان كراوە بەهیچ شێوەیەك وەك ساڵانی پێشوو بەرمیلەكان لەناو كۆڵانەكان دانەنێن، بەڵكو بۆ هاوكاریكردنی تەنكەرەكان و سەركەوتنی پڕۆسەكە، هەر ماڵێك بەرمیلەكەی تەنها لەبەردەم دەرگای ماڵی خۆی دابنێت.
بەپێی بڕیاری حكومەتی هەرێم، هەر خێزانێك بڕی 200 لیتر نەوتی سپی پێدەدرێت بەنرخی 104 هەزار دینار.