شارپرێس:

ئه‌نجومه‌نى نیشتمانى كوردى سوریا (ئه‌نه‌كه‌سه‌) دژى گردبونه‌وه‌كانى سوریاو داواكارییه‌كى ئه‌حمه‌د شه‌رع هاته‌ده‌نگ‌و ڕایده‌گه‌یه‌نێت، "ئەو گردبونەوانەی ئەحمەد شەرع داوایکردن، بۆ دژایەتی کوردو پێکهاتەکانی سوریابوو"، داواشده‌كات، "دەبێت حکومەتی وڵاتەکە هەڵوێستی یه‌كلاكه‌ره‌وه‌یان بۆ كێشه‌كان هه‌بێت نه‌ك دنه‌ى بدات‌و خه‌ڵك دژى یه‌كتر هانبدات".

ئەنەکەسە سه‌باره‌ت به‌ئاڵۆزییەکانی سوریا ڕاگەیەندراوێکی بڵاوکردەوەو ده‌ڵێت، "ئەو گردبونەوانەی ئەحمەد شەرع داوایکردبوو، وتاری دنەدان‌و ڕەگەزپەرستانەیان تێدا وترایەوە دژی کوردو پێکهاتەکانی دیکەی سوریا، ئەوەش دژی پیکەوەییە".

له‌و ڕاگه‌یه‌نراوه‌دا ئه‌نه‌كه‌سه‌ ئاماژه‌ى به‌وه‌داوه‌، "ئه‌وان لەوبارەیەوە داوایان لەحکومەتی سوریا کردوە هەڵوێستێکی ڕون‌و ئاشکرای هەبێت بۆ ڕەتکردنەوەی وتارە ڕەگەزپەرستانەكان‌و دژەپێکەوەییەکان".

هه‌روه‌ك ئه‌وه‌ش هاتوه‌، "ڕێگەی سەقامگیریی بەدانپێدانانی ڕاشکاوانە دەستپێدەکات بەوەی سوریا دەوڵەتێکی فرەنەتەوەیی‌و فرەئایینی‌و تائیفەی جۆراوجۆرەو دەبێت دەستورەکەی مافەکانی هەموان بەمافە نەتەوەییەکانی گەلی کوردیشەوە لەچوارچێوەی وڵاتەکە دەستەبەربکات".

ڕاگه‌یه‌نراوه‌كه‌ى ئه‌نه‌كه‌سه‌ دوای ئەوه‌دێت، لەکاتی ئاڵۆزییەکانی نێوان عەلەوییەکان‌و حکومەتی وڵاتەکەدا، ئەحمەد شەرع لەڕێگەی پەیامێکی ڤیدیۆییەوە داوای لەلایەنگرانی کرد بڕژێنە سەرشەقامه‌كان‌و پارێزگاریی لەیەکێتى‌و یەکپارچەیی وڵاتەکە بکەن.

ئەنەکەسە له‌و ڕاگه‌یه‌نراوه‌دا جه‌خت له‌سه‌ر داواكارییه‌كانى ئیداره‌ى خۆسه‌رى ڕۆژئاواى كوردستان كردوه‌ته‌وه‌ به‌پابەندبونی بەکارکردن لەپێناو سوریایەکی ناناوەندیی‌و دیموکراسیی‌و فرەیی.