شارپرێس:

وه‌زیرى سامانه‌ سروشتیه‌كان زانیاریى نوێ له‌باره‌ى كاره‌باى 24 كاتژمێریى ئاشكراده‌كات، ڕایده‌گه‌یه‌نێت، "دۆخی بەرهەمهێنانی غازو کارەبا نزیکە لەپێش هێرشەکەی سەر کۆرمۆر"، دەشڵێت، "داوای سیستمی بەرگریی دژەدرۆن کراوەو ئەمجارە عێراقش بەڕاستیی لەسەر هێڵە".

کەمال محەممەد وەزیری سامانەسروشتییەکان‌و هاوكات وه‌زیرى کارەبای هەرێم لەنوێترین لێدوانیدا لەبارەی دۆخی بەرهەمهێنانی غازو کارەبا پاش هێرشەکەی کۆرمۆر، ڕایگەیاند، "دۆخەکە لەکۆرمۆر بەرەو ئاساییبونەوە دەچێت‌و پاشئەوەی سێ هەزار مێگاوات کارەبا بەهۆی هێرشەکەوە لەدەستچوو، ئێستا ئاستی بەرهەمهێنانی کارەبا گەیشتوەتەوە دوو هەزار مێگاوات‌و پێشبینیشدەکەن تا ئێوارەی ئەمڕۆ بگاتەوە ئاستی پێش هێرشەکە کە چوار هەزار بۆ چوار هەزارو 500 مێگاواتە".

ئه‌وه‌شى وت، "لەبارەى بەرهەمی غازی کێڵگەی کۆرمۆریشەوە، لەڕابردودا ئاستی بەرهەمهێنانی غاز لەكێڵگەکە کۆرمۆر، 530 ملیۆن مەتر سێجا بوو، لەئێستادا گەیشتوەتە 404 ملیۆن پێ سێجا، واتە 76%ی بەرهەمهێنان".

وەزیری سامانەسروشتییەکان باسى له‌وه‌شكرد، "هەرچەندە یەکێک لەئامنجەکانی هێرشکەران دروستکردنی کێشەبوو بۆ غازی ماڵان، بەڵام دوێنێ یەکەم کاروانی غازی ماڵان لەلایەن وەزارەتی نەوتی فیدراڵەوە بۆ هەرێم نێردراو بەسەر شارەکاندا دابەشکرا".

سه‌باره‌ت به‌سیستمی بەرگریی له‌كۆرمۆر، کەمال محەممەد وتی، "حكومەتی هەرێم‌و کۆمپانیای دانەغازیش داوای سیستمی بەرگریی ئاسمانیی دژەدرۆنیان بۆ كێڵگەی کۆرمۆر کردوەو بابەتەکەش لەگەڵ هاوپەیمانان‌و دۆستانی هەرێم باسکراوەو حکومەتی عێراقیش ئەمجارە بەڕاستیی لەسەرهێڵە بۆ بابەتەکە".