شارپرێس:
دەستەی مافی مرۆڤ لەسەر ڕوداوەکەی گوندی لاجان هاته‌ده‌نگ‌و ڕایده‌گه‌یه‌نێت، سه‌ربارى قوربانیى توندوتیژی بەرامبەر چەند کەناڵێک‌و ڕۆژنامەنوسێک بەکارهاتوە.
ئێواره‌ى دوێنێ شەممە دوای ئەنجامدانی گردبونەوەی ژمارەیەک خەڵکی گوندی لاجان لەسنوری شاری هەولێر لەبەردەم کۆمپانیای لاناز ڕێگەیان گرتبون بۆ پێشکەشکردنی چەند داواکاریەک، سه‌ره‌نجام توندوتیژیی‌و تەقەی لێکەوتەوە بوە هۆی کوژرانی گەنجێک‌و بریندار بونی چەند کەسێکی تر لەخەڵکەکەو پاسەوانانی کۆمپانیاکە، دەستەی مافی مرۆڤیش ڕایگه‌یاندوه، "سه‌ربارى ئه‌وانه توندوتیژیی بەرامبەر چەند کەناڵێک‌و ڕۆژنامەنوسێک بەکارهاتوە".
دەستەكه ده‌ڵێت، "ئیدانەی هەر جۆرە توندوتیژیەک ده‌كه‌ین کە ببێتە هۆی بەکارهێنانی چەک‌و کوشتنی لێبکەوێتەوە".
باسى له‌وه‌شكردوه، "بۆ ئەو مەبەستە بەفەرمانی سەرۆکی دەستە، لەنزیکەوە تیمێکی تایبەتی دەستەی مافی مرۆڤ بەسەرۆکایەتی تاڤگە عومه‌ر بەڕێوەبەری گشتیی فەرمانگەی یاساو پاراستنی مافی مرۆڤ‌و وه‌فدێكى ناردە شوێنی ڕوداوەکەو لەوێ لەگەڵ چەند کەسێکی مەدەنی گفتوگۆیان کرد لەسەر ڕوداوەکە".
ئه‌وه‌ش هاتوه، "دوای گفتوگۆی تیمی دەستەو هەریەک لەپارێزگاری هەولێرو بەڕێوەبەری ئاسایشی هەولێر بۆمان دەرکەوت کە لێکۆڵینەوە بەردەوامەو بەڵگەکان کۆکراونەتەوە بۆ دۆزینەوەی ئەوکەسانەی تەقەیان کردوەو ئاماژەیان بەوەداوە، هەرکەسێک تەقەی کردبێ ڕێکاری یاسایی بەرامبەر ئەنجامدەدرێت".
دەستەی مافی مرۆڤ وێڕای پشتگیریکردن لەداواکاری هاوڵاتیان بۆ دابینکردنی ژیان‌و مافەکانیان لەهەمانکاتدا ده‌ڵێت، "پشتیوانیی لەگردبونەوەکان دەکه‌ین بەڕێکاری یاسایی‌و مەدەنی دور لەتوندوتیژیی‌و هەمیشە دژی بەکارهێنانی چەک‌و توندوتیژین، دڵنیاتان دەکەین کە بەردەوامدەبین لەچاودێریکردنی ئەم کەیسەو دەرەنجامی لێکۆڵینەوەکان‌و پێویستە تەقەکەران‌و تۆمەتباران بەزویی بدۆزرێنەوە بدرێنە دادگا".
