شارپرێس:
بافڵ تاڵەبانی رایگەیاند، لە پەیوەندیی بەردەوامداین تاوەکو دۆخەکە نەچێتە قۆناغێکی سەختتر و هەرێمی کوردستان و عیراق نەبنە بەشێک لە ململانێکان.

بافڵ تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە سه‌ڵاحه‌دین محەمەد به‌هائه‌دین، ئەمیندارى گشتیی یه‌كگرتوى ئیسلامى كوردستان کرد و دوایین پێشهات و دۆخی جەنگ لە ناوچەکە تاوتوێکرا.

بافڵ تاڵەبانی جەختی لە بەردەوامی هەوڵی ئاشتیخوازانەی یەکێتی کردەوە و وتی، لە پەیوەندیی بەردەوامداین لەگەڵ حزب و لایەنەکانی عیراق و هەرێمی کوردستان تاوەکو دۆخەکە نەچێتە قۆناغێکی سەختتر و هەرێمی کوردستان و عیراق نەبنە بەشێک لە ململانێکان.

بەپێی راگەیەنراوی نوسینگەی سەرۆکی یەکێتی، لە کۆبونەوەکەدا جەخت لە هەماهەنگی و بەهێزترکردنی پەیوەندییەکانی یەکێتی و یەکگرتوی ئیسلامی کوردستان لە چوارچێوەی زیاتر خزمەتکردنی خەڵک و پاراستنی بەرژەوەندییە باڵاکان کرایەوە.