شارپرێس:

بە پێی ئەو ڤیدیۆیانەی بڵاوکراونەتەوە ئیوارەی ئەمرۆ بە موشەک و تەقەی راستەوخۆ هێرشکراوەتە سەر ناوچەیەکی سنوریی نێوان هەڵەبجە و کۆماری ئیسلامی ئێران لە سنوری شاخی بەفری میریی و زانیاریەکان باس لەوە دەکەن تاوەری کۆمپانیاکانی پەیوەندی ئامانجی هێرشەکان بون.

شارپرێس بەدواداچونی بۆ هێرشەکان کرد و ئەو کەسانەی کە لە سنورەکە بون دەڵێن جگە لەموشەک، هێرشی چەکداری کراوەتە سەر ناوچەکە و چەند فیشەکێک ئاراستەی نزیک تاوەرەکان کراون بە بێ ئەوەی هیچ کەس بپێکن، هاوکات هێرشی موشەکی کراوەتە سەر ناوچە سنورییەکە لە سنوری شاخی بەفری میری کە ناوچەیەکی سەخت و دژوارە و بەهۆی بەرزییەکەیەوە ژمارەیەک تاوەری کۆمپانیاکانی پەیوندی و ئەنتەرنێتی تێدایە.

سەچاوەکانی شارپرێس ئاماژەیان بەوەکرد ئامانجی هێرشەکان تاوەرەکان بوە، بەڵام بێ زیان کۆتاییهاتوە و هیچ زیانێکی گیانی و ماددی لێ نەکەوتۆتەوە.

تا ئامادەکردنی ئەم هەواڵە دەزگا ئەمنییەکانی سنوری پارێزگای هەڵەبجە هیچ زانیاریەکانیان لەبارەی هێرشەکانەوە بڵاونەکرۆتەوە، بەڵام بەپێی زانیاریەکانی شارپرێس دۆخی پاریزگاکە بە تەواوی ئارامە و هیچ مەترسیەک لەسەر ناوچەکە نییە، بەهۆی دوری شوێنی هێرشەکان لە ناوەندی پارێزگاکە و ئاوەدانییەوە.