شارپرێس:
بنیامین نەتانیاھۆ، سەرۆکوەزیرانی ئیسرائیل لە وەڵامێکی تۆمارکراودا ڕایگەیاند کە ڕێککەوتنی چوارچێوەیی لەگەڵ لوبنان گورزێکی گەورەیە بۆ سەر ئێران، و ئاماژەی بەوە کرد کە تەنیا بەشێکی بچووک لە ناوچەی تاقیکاری 2 لە باکووری لیتانی لە ناوەوەی هێڵی زەرددا دەبێت.

 
نەتانیاھۆ وتویەتی کە ئەوان لەگەڵ لوبنان چوارچێوەیەکی کارکردنیان بە مەبەستی گەیشتن بە ڕێککەوتنی داهاتوو واژۆ کردووە و بەردەوام ناوچە ئەمنییە ڕەسەنەکە دەپارێزن.

هەروەک جەختی کردۆتەوە کە ئیسرائیل لە ناوچە ئارامەکەی باشووری لوبنان دەمێنێتەوە مادام حزبوڵڵا چەک دانەنێت، و گوتیشی ئێران دەیەوێت بە زۆر ناچارمان بکات لە باشووری لوبنان بکشێینەوە، بەڵام ئیسرائیل و لوبنان و ئەمریکا پێیان دەڵێن ئەمە کاری ئێوە نییە و هیچ ڕۆڵێکتان نییە. 

نەتانیاھۆ ڕوونیکردۆتەوە کە ڕێگە بە سوپای لوبنان دەدەن ڕێکخستنەوە بکات بۆ کۆنترۆڵکردنەوەی خاکەکە و بە پێشنیاری سوپای ئیسرائیل 2 ناوچەی تاقیکاری دروست دەکەن، یەکێکیان لە باشووری ڕووباری لیتانی و ئەویتر لە باکووری لەو ناوچە ئەمنییە فراوانەی لە 2 هەفتەی ڕابردوودا بەدەستهاتووە. 
ئەم ڕێککەوتنە ئێوارەی هەینی پاش 4 ڕۆژ لە دانوستاندنی واشنتۆن بە چاودێریی ئەمریکا واژۆ کرا بۆ جێبەجێکردنی ئاگربەست.