شارپرێس:
میدیا جیهانییەکانو ناوەندەكانى واشنتۆن لەکاتژمێرەکانی سەرەتای ئەمڕۆدا، هەواڵی کۆچی دوایی کتوپڕی یەکێک لەکاریگەرترینو ناسراوترین سەرکردەکانی پارتی کۆماریی ئەمریکا، (لیندسی گراهام)یان ڕاگەیاند، بهگوێرهى بەیاننامەی فەرمی نوسینگەکەی، ناوبراو بەهۆی نەخۆشییهكی کتوپڕو کورتخایەنەوە (کە بهگوێرهى زانیارییە سەرەتاییەکان جەڵتەی دڵ بوە) کۆچی دوایی کرد.
لەیاساناسی سەربازییەوە بۆ لوتکەی کۆنگرێس
لیندسی گراهام لەساڵی 1955 لەویلایەتی کارۆلاینای باشور لەدایکبوه، ئەو پێشئەوەی بێتە ناو جیهانی ڕامیاریی، وەک پارێزەرو یاساناسی سەربازیی لەناو هێزی ئاسمانیی ئەمریکادا خزمەتیکردوەو پلەی عەقیدی بەدەستهێناوە. لەساڵی 1994 بۆ یەکەمجار وەک ئەندامی ئەنجومەنی نوێنەران هەڵبژێردراو لەساڵی 2002وە تا دوا ساتەکانی ژیانی، بۆ ماوەی زیاتر لەدوو دەیە، وەک سێناتۆری دیاری ویلایەتی کارۆلاینای باشور لەئەنجومەنی پیرانی ئەمریکا خزمەتیکرد.
ئەندازیاری سیاسەتی دەرەوەو هاوپەیمانی ترهمپ
گراهام بەیەکێک لەبازەکانی واشنتۆن دەناسرا، کە هەمیشە داکۆکیکاری سیاسەتێکی دەرەوەی توندو دەستوەردانی سەربازیی ئەمریکا بوو لەجیهاندا بۆ پاراستنی ئاسایشی نیشتمانی. هەرچەندە لەساڵی 2016دا ڕکابەرو ڕەخنەگرێکی توندی دۆناڵد ترهمپ بوو، بەڵام دواتر بوو بەیەکێک لەنزیکترینو دڵسۆزترین هاوپەیمانو ڕاوێژکارەکانی ترهمپ لەسەر گردی کاپیتۆڵ.
دۆستێکی دڵسۆزی گەلی کورد
بۆ گەلی کورد، لیندسی گراهام تەنها ڕامیارکارێکی بیانی نەبوو؛ ئەو بەیەکێک لەسەرسەختترین داکۆکیکارانی مافەکانی کوردو هێزی پێشمەرگە لەناو ناوەندە بڕیاربەدەستەکانی ئەمریکادا دادەنرا، لەکاتی شەڕی دژی داعشدا چەندینجار سەردانی هەرێمی کوردستانی کردو لەکۆنگرێسی ئەمریکاش کەمپینی بۆ پڕۆژەیاسای پاراستنی کوردو ڕێگریکردن لەهێرشکردنەسەریان دەکرد.
گەشتەکەی کۆتایی بۆ ئۆکرانیاو ماڵئاوایی
کۆچی دوایی گراهام بەتەواوی واشنتۆنی هەژاندوه، بەتایبەت کە ناوبراو تەنها 24 کاتژمێر پێش مەرگی، لەگەشتێکی فەرمی لەکێڤی پایتەختی ئۆکرانیا گەڕابوەوە کە لەوێ لەگەڵ ڤۆلۆدیمیر زێلێنسکی سەرۆکی ئەو وڵاتە کۆببوەوە، نوسینگەی گراهام ڕایگەیاندوە، خێزانەکەی داوای نزای خێرو پاراستنی تایبەتمەندی خۆیان دەکەن لەمکاتە سەختەدا.
