شارپرێس:

سەرۆکایەتی هەرێمی کوردستان هێرشی گروپە چەکدارەکانی عێراق بۆ سەر دامەزراوەکانی وزە لەسعودیە سەرکۆنە دەکات و پشتیوانی لەو رێکارانە دەکات کە حکومەتی عێراق بۆ لێکۆڵینەوە لەو دەستدرێژییانە گرتویەتیەبەر.

سەرۆکایەتی هەرێمی کوردستان لەڕاگەیەنراوێکدا ئاماژەی بەوەکرد،" ئیدانەی ئەو هێرشانە دەکەین کە کرانە سەر بۆرییەکانی نەوت لەسعودیەی برا و هاوپشتی تەواوی خۆمان لەگەڵ شانشینی سعودیە و پەرۆشیمان بۆ ئاسایش و سەقامگیرییەکەی دوپاتدەکەینەو ".

ئەوەشیخستەڕوو،" پشتیوانی لەو رێکارانە دەکەین کە حکومەتی فیدراڵی عێراق بۆ لێکۆڵینەوە لەو دەستدرێژییانە و ئاشکراکردن و لێپرسینەوە لە بەرپرسانی دەیگرێتەبەر".

سەرۆکایەتی هەرێم باسی لەوەشکردوە، جەختیش دەکەینەوە کە نابێت خاکی عێراق ببێتە سەرچاوەی هیچ هەڕەشە و دەستدرێژییەک بۆ سەر وڵاتانی دراوسێ، رێزگرتن لەسەروەری وڵاتان، دراوسێیەتی باش و پەنابردنەبەر دیالۆگ و هاوکاری، گونجاوترین رێگەن بۆ پاراستنی ئاسایش و سەقامگیری عێراق و پتەوکردنی ئاشتی و سەقامگیری لە ناوچەکەدا.