شارپرێس:
لە قەزاى بەردەڕەش سەر بە پارێزگاى دهۆک، گەنجێک تووشى نەخۆشییەکى نامۆ دەبێت و لە برى فرمێسک، خوێن لە چاوى دەڕژێت و بەبێ برینداربوونى سەر، گوێ، لووت و دەمى خوێنى لێ دەچۆڕێت.
محمود بەهجەت، گەنجێکى تەمەن 23 ساڵە و پیشەى کاسبکارە و دانیشتووى گەڕەکى شیوەڕەى قەزاى بەردەڕەشى سەربە پارێزگاى دهۆکە. ماوەى دوو مانگ دەبێت تووشى نەخۆشییەکى نامۆ بووە و رۆژ دواى رۆژ نەخۆشییەکەى لە پەرەسندندایە.
دایک، باوک، خوشک و براى مەحمود شەو و رۆژ ئێشکگرن و چاودێرى دۆخى تەندروستى ئەو ئەندامەى خێزانەکەیان دەکەن لە شەو رۆژێک یان زیاتر جارێک بۆ دووجار خوێن لە چاو، لووت، دەم، گوێ و سەرى دەڕژێت، هەندێکجار لە هۆش خۆى دەچێت و جارى وەهاش هەیە هەست بە دەورووبەر دەکات و دەزانێت کە خانەوادەکەى چەندە پەرۆشى تەندروستى ئەون.
ماوەى دوو مانگە سەرجەم داهاتى ئەم خانەوادەیە بۆچارەسەرکردنى نەخۆشییەکەى ئەم گەنجە تەرخانکراوە، ئەمەیش تاڕاددەیەک ئەرک و ژیانى خانەوادەکەى قورستر کردووە.
مەحمود بەهجەت عەبدولڕەحمان عەبدوڵڵا بە ئاژانسى ئانادۆڵ-ی راگەیاندووه، "ماوەى دوو مانگ دەبێت تووشى نەخۆشییەک هاتووم کە خوێن لە چاو و گوێ و سەرم دێت بەبێ ئەوەى هیچ بریندار بوون و بەرکەوتنێک، نەک هەر خۆم و خانەوادەکەم تەنانەت پزیشکەکانى پارێزگاى دهۆک، و پارێزگاى نەینەواش سەریانسوڕماوە لە نەخۆشییەکەم".
راشیگه‌یاند، "سەرەتا خوێن لە دەم دەهات، زۆر هەوڵماندا دکتۆرەکان هیچ چارەسەرێکیان نەدۆزییەوە، دواتر نەخۆشییەکەم پەرەى سەند و خوێن لە چاو، گوێ و سەریشم هات، لەو کاتەى خوێن لە چاوم دێت پێستى رووخسارم دەجوڵێت، تا ئێستا 50 پشکنینى پزیشکیم ئەنجامداوە، هیچ ئەنجامێک دەرنەکەوتووە و تا ئێستا ناو و جۆرى نەخۆشیەکەشم نازاندرێت".
سەرەڕاى نەخۆشییە نامۆکەى، ئەو گەنجە لەگەڵ خەڵک و ناسیاوەکانى قسە خۆش و دەم بەخەندەیە، بەڵام کە باسى نەخۆشییەکەى دەکات، نیگەرانى و خەمێکى قووڵ لە رووخسارى بەدەردەکەوێت، تاکە داواکارى و ئاواتى لە ژیانى گەنجیەتى ئەوەیە کابینەى نوێى حکوومەتى هەرێمى کوردستان و وڵاتانى دراوسێ چارەسەرێک بۆ نەخۆشییەکە بدۆزنەوە.
ئەمجەت عەبدولڕەحمانى، مامى مەحمود رایگه‌یاند، "سەرەتا خوێن لە دەمى دەهات، دواتر خوێن لە چاو، گوێ، لووت و سەریشى هات، خوێنەکە دەسڕینیەوە هیچ برینێک نابینین، زۆرجار بە هۆى نەخۆشییەکەى دەکەوێت و لە هۆش خۆى دەچێت و هیچ کەس ناناسێتەوە".
هاوكات ئازاد بەهجەت براى ئەو گەنجە نەخۆشەیە رایگه‌یاند، "بە شەو و رۆژ من، دایکم و باوکم و براکانى دیکەم وەکو پاسەوان و ئێشکگرێک لە چاودێرى تەندروستى براکەمانین، بۆ ئەوەى نەخۆشییە قورسەکەى تووشى هیچ کێشەى دیکەى نەخوازراومان نەکات".
ئەو برایەى مەحمود بەهجەت دەڵێت، "نەخۆشییەکە هێندە نامۆیە پزیشکەکانیش سەریانسوڕماوە و لە کۆى 50 پشکنین تا ئێستا ناوى نەخۆشییەکەشیان نەزانیوە، بۆیە داواکارم لە حکوومەتى هەرێمى کوردستان و حکوومەتى تورکیا، چارەسەرێک بۆ نەخۆشییەکەى ئەم گەنجە بدۆزنەوە".
تاکە داواکارى ئەم خانەوادەیە لە حکوومەتى هەرێمى کوردستان، حکوومەتى عێراق و وڵاتانى دراوسێ چارەسەرکردنى نەخۆشییەکەى ئەم گەنجەیە. هەرکاتێک ئەم گەنجە تووشى خوێن بەربوون دێت، ماڵەوە دەشڵەژێن و ئارامییان لێ دەبڕێت.
ه.م
