شارپرێس:

فیدراسیۆنی لێكۆڵینەوە ئیسلامییەكانی میزۆپۆتامیا بە دروشمی "ئیسلامی دیموكراتیك: دڵسۆزی لە باوەڕدا، ئازادی لە كۆمەڵگەدا"، سێیەمین كۆنفرانسی خۆی لە هۆڵی عەلی ئەمیری سەر بە شارەوانیی گەورەی ئامەدی باكوری كوردستان بەست.

 دیلان ئایدن ئەنجامنامەی كۆنگرەكە خوێندەوە و رایگەیاند، ئەوان وەك زانا، ئەكادیمیست، ڕووناكبیر، ژن، گەنج، ڕیشسپی و نوێنەرانی پێكهاتەكانی  كۆمەڵگە لە سێیەمین كۆنفرانسی گەورەی كۆنگرەی ئیسلامی دیموكراتیكدا كۆبوونەتەوە.

دەشڵێت "بە تێڕوانینی ئیسلامی دیموكراتیكەوە هەڵسەنگاندنێكی بەرفراوانمان بۆ پێشهاتە سیاسی، كۆمەڵایەتی، كولتووری و ئایینییەكانی توركیا، كوردستان، ڕۆژهەڵاتی ناوەڕاست و جیهان كرد. كۆنفرانسەكەمان دەریخستووە كە ئەم سەردەمەی مرۆڤایەتی پێیدا تێدەپەڕێت، تەنیا قەیرانێكی ئابوری یان سیاسی نییە، بەڵكو قەیرانێكی قووڵی ئەخلاقی، دیموكراتیك و واتایی كۆمەڵایەتییە. مرۆڤایەتی لە لایەكەوە ڕووبەڕووی دەرەنجامە قورسەكانی شەڕ، بێدادی، هەژاری و وێرانكاریی ژینگەیی بووەتەوە و لە لایەكی دیكەشەوە گەواهیدەری لاوازبوونی ئەو بەها ئەخلاقی و دیموكراتیكانەیە كە پێكەوەژیان دەستەبەر دەكەن. 

راشیگەیاند، ڕۆژهەڵاتی ناوەڕاست یەكێكە لەو ناوچانەی كە ئەم قەیرانە فرەڕەهەندەی زۆرترین كاریگەریی تێدا هەیە. كارەساتی فەلەستین، وێرانكارییەكانی سوریا، ناسەقامگیریی عێراق، ئەو شەڕانەی گەلانی ناوچەكە ڕووبەڕوویان دەبنەوە لەگەڵ كۆچە زۆرەملێیەكان، نیشانی دەدەن كە پارادایمی سیاسیی ئێستا توانای چارەسەری نەماوە."

هەروەها ئایدن دەڵێت، واقیعی كۆمەڵایەتیی ڕۆژهەڵاتی ناوەڕاست كە خاوەنی چەندین ناسنامە، كولتوور و باوەڕە، ناگونجێت لەگەڵ ئەو مۆدێلە سیاسییانەی كە لەسەر بنەمای یەك زمان، یەك ناسنامە و یەك كولتوور بونیاد نراون، سیستەمی نەتەوە-دەوڵەت لە زۆر شوێندا لەبری دروستكردنی یەكگرتووییەكی دیموكراتیك، نكوڵیكردن، ئاسیمیلاسیۆن، پارچەبوون و شەڕی قووڵتر كردووەتەوە. لەبەر ئەوە، كۆنفرانسەكەمان ڕایدەگەیەنێت كە هۆشمەندیی نەتەوە-دەوڵەت بەم شێوەیەی ئێستای گەیشتووەتە سنوورە مێژووییەكانی خۆی؛ ئیتر گۆڕانكارییەكی نوێی سیاسی و كۆمەڵایەتی كە یەكێتیی ئازادی گەلان، دیموكراسیی خۆجێیی، فرەیی كولتووری و بەشداریی دیموكراتیك بە بنەما بگرێت، بووەتە پێویستیی.