شارپرێس:
وتەبێژی حكومەتی هەرێم لەسەر ئۆپراسیۆنەكەی توركیا بەیاننامەیەكی بڵاوكردەوە و دەڵێت، داوا لە کۆماری تورکیا دەکەین، رێز له سه‌روه‌ری خاك و نیشتیمانمان بگرێت و پەکەکەش پێویستە ئەو ناوچانە چۆڵ بکات، تا چیتر نەبنە هۆکار بۆ دروستکردنی پشێوی لە ناوچە سنووریەکانی هەرێمی کوردستان.
ده‌قی راگه‌یه‌ندراوه‌كه‌ی وته‌بێژی حكومه‌تی هه‌رێم:
بە دڵگرانی و نیگەرانیەکی زۆرەوە چاودێری رووداوەکانی ئەمڕۆ و چەند رۆژی رابردووی ناوچە سنووریەکان دەکەین، کە بووه هۆی گه‌یاندنی زیانی گیانی و ماددی بە هاووڵاتیانی سڤیل و گوندنشینانی ئەو ناوچانە.
حكومه‌تی هه‌رێمی كوردستان سەرکۆنەی شەهیدکردن و زیان گەیاندن بەهاووڵاتیان دەکات لەلایەن هەر لایەنێك و بەهەر هۆکارێك بێت.
داوا لە کۆماری تورکیا دەکەین، رێز له سه‌روه‌ری خاك و نیشتیمانمان بگرێت و پەکەکەش پێویستە ئەو ناوچانە چۆڵ بکات، تا چیتر نەبنە هۆکار بۆ دروستکردنی پشێوی لە ناوچە سنووریەکانی هەرێمی کوردستان.
حکومەتی هەرێمی کوردستان خوازیاری پەیوەندیی دۆستانەیە لەگەڵ وڵاتانی دراوسێ و نایەوێت لەناو خاکی هەرێمی کوردستان هێرش بکرێتە سەر هیچ وڵاتێك.
لێرەوە پرسە و سەرەخۆشی لە کەسوکاری قوربانیان دەکەین و هیوای چاکبوونەوەش بۆ برینداران دەخوازین.
د.جوتیار عادل
گوتەبێژی حکومەتی هەرێمی کوردستان
19ی حوزەیرانی 2020
