دۆسییەکا دی بۆ گۆهدار زێباری هاتە ڤەکرن

کوردستان

01/12/2021‌ 825 جار خوێندراوه‌ته‌وه

شارپرێس ـ دهؤك:

پارێزەرەکێ دەستەسەرکریێن بەهدینان ڕاگەهاند، توهمەتا دیتنا چەکێ تاپڕیان د ترۆمبێلاوی دا بۆ ڕۆژنامەڤان گوهدار زێباری هاتیە زێدەکرن.


ئەڤرۆ چارشەمبی، بەشدار حەسەن پارێزەرێ دەستە سەرکریێن بەهدینان د ڤەیسبوکا خۆدا بەلاڤکریە، کێمەکی بەریانها ڕۆژنامەڤان گوهدار زێباری، ئینا دەف دادوەرێ ڤەکۆلینا ئاسایشێ.

ئاماژە ب وێ ژی دا، توهمەتەکا دی ئێخستە سەر گوهدار زێباری کو دبیژن چەکێ تاپڕیان دناڤ تڕۆمبێلاوی دا هاتیە دیتن، لێ گوهدار ڕەت دکەت و دبێژیت "ئەڤ چەکە نەیێ منە و یاهاتیە دروستکرن".

بەشدار حەسەنی ئەو یەک ژی ئاشکەراکریە، "ڤەکرنا ڤێ دوسیێ ژی پەیوەندی ب وێ چەندێ ڤەهەیە، کو چەند جاران د زیندانێ دا ئاخڤتیە و نامە شاندینە ژ دەرڤە و بەلاڤ بووینە ژی".

دۆسیەیا دەستەسەرکرنا چالاکڤان و ڕۆژنامەڤانێن بەهدینان لسەر ئاستێ ناڤخۆ و نێڤدەولەتی زێدەتر کارڤەدان ل دیڤ خۆ ئینان و دنهادا داخازا ئازاد کرنا هەمی دەستەسەرکریان دهێتە کرن.

دەمێ زێدەتر  ژ 16 مەهانە، هەژمارەکا چالاکڤان و رۆژنامەڤانێن بەهدینان ژئالیێ دەزگەهێ ئەولەهیێن هەرێمێ ڤە ب چەند توهمەتان دەستە سەرکرینە، پشترا ژی دادگەها دیڤچونا هەولێرێ بڕیارا سزادانا شەش سالێن زیندان کرنێ بۆ پینج ژ وان دەرئێخست، زێدەباری ڕەخنەیان ژی ل وێ بڕیارێ، لێ داوی جار دادگەها دیڤچوونێ ئەو بڕیار پەسەندکر کو ئێک ژ وان گوهدار زێباری بوو.