شارپرێس:
سەرۆک وەزیرانی عێراق ڕایده‌گه‌یه‌نێت، "په‌یوه‌ندی ئه‌مریكاو عێراق كلیلی سه‌قامگیریی ڕۆژهه‌ڵاتی ناوه‌ڕاسته‌و كۆبونه‌وه‌مان له‌گه‌ڵ جۆ بایدن، سه‌رۆكی ئه‌مریكا له 15ی ئه‌م مانگه ده‌رفه‌تێكه بۆ هاوبه‌شێتی نوێ لەنێوان به‌غداو واشنتۆن"، ده‌شڵێت:"پەیوەندی نێوان ئەمریکاو عێراق فاکتەری سەقامگیرییە لەڕۆژهەڵاتی ناوەڕاستدا".
محه‌ممه‌د شیاع سودانی وتارێکى لەگۆڤاری فۆڕن پۆڵەسی ئەمریکی بڵاوکردوەتەوە بەر لەیەکەم سەردانی بۆ واشنتۆن‌و کۆبونەوەی لەگەڵ جۆ بایدن لەکۆشکی سپی، دیدگای خۆی لەبارەی پەیوەندی نێوان هەردوو وڵات‌و هاوکاریی بەردەوامی نێوان بەغداو واشنتۆن خستوەتەڕوو.
سودانى نوسیویه‌تى:"دوو دەیە لەمەوبەر ئەمریکا یارمەتی عێراقییەکانیدا بەلەناوبردنی ڕژێمی دیکتاتۆری سەدام حوسێن‌و دانانی بناغەکانی سیستمی دیموکراسی، ئەمەش یارمەتی عێراقییەکانیدا بۆ یەکەمجار تامی ئازادی بکەن، هەروەها ستەمکاریی‌و خراپ بەکارهێنانی سەرچاوەکان کە کێشەیان لەعێراق‌و ناوچەکەش لێکەوتبووەوە".
جه‌ختیشده‌كاته‌وه، "پەیوەندییەکانی نێوان هەردوو وڵات لەوکاتەوە، بەزۆر هەورازو نشێودا تێپەڕیوەو قۆناغی زۆر ئاڵۆزو نزیکیشی بەخۆیەوە بینوە، لەو ماوەیەدا، لێکتێگەیشتنێکی هاوبەش لەنێوان سەرکردەکانی هەردوو وڵاتدا هەبوە کە پەیوەندیی نێوانمان وەک کاری هەرە لەپێشینەی ستراتیژی دەمێنێتەوە، بە لەبەرچاوگرتنی بەرژەوەندی هاوبەش‌و هەوڵی هاوبەش لەپێناو تێپەڕاندنی ئاڵنگارییەکان، هەر بەو شێوەیەش پێکەوە تیرۆرمان تێکشکاندو لەهاوکاری ئەمنی بەردەوامبوین بۆ دوبارە بونیادنانەوەى سوپای عێراق‌و هێزە ئەمنییەکان".
سه‌رۆك وه‌زیرانى عێراق ده‌شڵێت:"پێویستە ئەو هاوبەشییە ستراتیژییەی نێوانمان، نوێبکەینەوە بەگواستنەوەی بۆ قۆناغێکی نوێ کە پاڵپشتی لەسەروەریی‌و سەربەخۆیی عێراق بکات، بەبێئەوەی دەستبەرداری هاوکاریی بەرهەمداری نێوان بەغداو واشنتۆن بین، لەکۆتایی مانگی یەکى ئه‌مساڵیشدا لیژنەی باڵای سەربازیمان پێکهێنا، کە پێکهاتبوو لەبەرپرسانی باڵای سەربازیی ئەمریکاو عێراق، بەمەبەستی هەڵسەنگاندنی مەترسییە بەردەوامەکانی داعش‌و توانای هێزە ئەمنییەکانی عێراق لەڕوبەڕوبونەوەی مەترسییەکان لەهەموو بارودۆخەکاندا لەسەرتاسەری وڵاتدا، کە ئەم هەوڵەش بوە هۆی ڕێککەوتن بۆ کۆتاییهێنان بەئەرکی هاوپەیمانی نێودەوڵەتی بەشێوەیەکی بەرنامە بۆ داڕێژراو بەگوێره‌ى خشتەیەکی کاتی".
له‌وتاره‌كه‌یدا سودانی باسى له‌وه‌شكردوه، "ئەو هەنگاوە نوێیەیان وادەکات بۆ داهاتوو، پەیوەندییەکانیان بچێتە قۆناغێکی نوێوەو زیاتر لەوەی تەنها لەبوارەکانی کاروباری ئەمنی‌و سەربازیدا هاوبەشییان هەبێت، چونكه ئێمه جه‌ختده‌كه‌ینه‌وه، پەیوەندیی نێوان ئەمریکاو عێراق فاکتەری سەقامگیرییە لەڕۆژهەڵاتی ناوەڕاست".
سه‌باره‌ت به‌گروپە چەکدارەکانیش، سودانی نوسیویه‌تى:"بونی ئەو گروپانە لەماوەی دوو دەیەی ڕابردودا لەدۆخێکی ئاڵۆزدا لەدایکبون، بۆیە بەبەردەوامی لەسەر بەدیهێنانی ئاسایش‌و سەقامگیریی لەوڵات، وادەکات چیتر پێویست نەبێت کە چەک لەدەرەوەی دەوڵەتدا هەبێت‌و ئێستاش حکومەتەکەم کار بۆ ئەو ئامانجە دەکات".
ئه‌وه‌شى وتوه، "عێراق ڕێگه‌یەکی دورودرێژی لەپێشەو پڕە لەئاڵنگاریی، کابینەکەی منیش ئاگاداری هەڵوێستە هەستیارو هاوسەنگییەکانی خۆیەتی کە دەبێت لەنێوان ئەمریکاو گروپە چەکدارەکاندا بیپارێزێت، کە هەندێکجار دەچنە ڕوبەڕوبونەوەی ڕاستەوخۆ لەگەڵ هێزەکانی ئەمریکا، بەڵام دیدگای ئێمە بۆ ئەم دۆخە ڕونە کە هێرشکردنەسەر بەرژەوەندییەکان ڕەتدەکەینەوە، وه‌كو پەیامێکیش بۆ گروپە چەکدارەکان، ده‌بێت هه‌موان ئه‌وه بزانن، بڕیاری شەڕو ئاشتی، دەبێت پرسێکی تایبەت بێت بەدەوڵەت‌و هیچ لایەنێکی دیکە ناتوانێت داوای ئەم مافە بکات".
