شارپرێس:
سیپان حەمۆ ئەندامی فەرماندەیی گشتیی هێزهكانى سوریاى دیموكرات (هەسەدە) ڕایگەیاند، "بەرپرسێکی حکومەتی کاتیی سوریا دەستێوەردانی لەدوایین کۆبونەوەیان لەدیمەشق کردو کۆبونەوەکەی ڕاگرت، دەرکەوت پیلانگێڕییەک بەڕێوەدەچێت"، دەشڵێت، "بەرخۆدانی شێخ مەقسودو ئەشرەفیە یەکهەڵوێستی کوردی دەرخستو بەتانکو درۆنی تورکی هێرشکرا"، جهخیشدهكاتهوه، "شهڕڤانانى ئهشرهفیهو شێخ مهقسود-یش بهشێكن لهئێمهو سهر بهیهك قوتابخانهین".
“بەرپرسێکی حکومەتی سوریا کۆبونەوەکەی ڕاگرت”
لەچاوپێكهوتنێكى تهلهفزیۆنیدا سیپان حەمۆ ئەندامی فەرماندەیی گشتیی هێزهكانى سوریاى دیموكرات (هەسەدە) وردەکاریی کۆبونەوەکەی دیمەشق لەنێوان ههسهدهو حکومەتی سوریا کە لەچوارى ئەم مانگە بهڕێوهچوو ئاشكرادهكاتو دهڵێت، "هێزە نێودهوڵهتیهكان نێوەندگیرییان دەکرد".
دهشڵێت، "هەردولا ئەم خاڵانەیان قبوڵکرد، چوینە کۆبونەوەی کۆتایی، کۆبونەوەیەکی ئەرێنی بوو، چونکە هەردولا خاڵە هەبوەکانیان قبوڵکردبوو، تەنانەت هێزە نێودهوڵهتیهكانیش دەیانویست ئەو پێشهاتانە بۆ ڕای گشتیی ڕابگەیەندرێت، لەکاتێکدا باسی ئەم بابەتەمان دەکرد، بەرپرسێکی دیكهى دەوڵەت هاتە ژورەوە، کاتێک بینی کۆبونەوەکە بەشێوەیەکی ئەرێنی دەڕوات، بەرپرسی هەواڵگرییو وەزیری بەرگریی لەگەڵ خۆی بردو ڕۆیشتن، کاتێک گەڕانەوە، وتیان لەئێستادا هیچ لێدوانێک نادەین، بۆ 7 یان 8ـی مانگ جێیبهێڵن، دەرکەوت پیلانگێڕییو فێڵێک لەئارادایە، بەڵام دیارنەبوو شێخ مەقسودە یان شوێنێکی دیكه، بۆنی پیلانگێڕییەک دەهات، پاشان زمانی هەڕەشەکردن لەشێخ مەقسود پەرەیسەند".
“بەرپرسی چەند دەوڵەتێک هەمان ڕۆژ لەدیمەشق بون”
حەمۆ ئهوهشى ئاشكراكرد، "ئەنجومەنی گەڕەکی شێخ مەقسود بڕیاری بەرخۆدانیداوەو وتی، "هەرچەند ئێمە وەک هەسەدە لەوێ کشابوینەوە، ڕێزمان لەبڕیارەکەیان گرتو پشتگیرییمان لێکردن، جگە لەخاوەنداریکردن لەم بڕیارە، هیچ هەلێکی دیكه نەبوو، زۆ شت وترا، دەوترا با هەسەدە جوڵە بکات، پێشڕەوی بکات، پێویستە بزانرێت، لەمڕوەوە، حساباتی فرەلایەن هەبون، بابەتەکە تەنها شێخ مەقسودو ئەشرەفیە نەبون".
بهوتهى سیپان حهمۆ، "هەموان دەزانن هێرشی سەر شێخ مەقسودو ئەشرەفیە لەڕاگەیاندنی دەرەوەی سوریاوە ڕاگەیاندرا نەوەک لەڕاگەیاندنی ناوخۆوە، بەرپرسی هەندێک وڵات لەهەمان ڕۆژدا لەدیمەشق بونو بەڵێنی پشتیوانییان بۆ حکومەتی کاتییی دیمەشق دوپاتکردەوە، بەم پشتگیرییەوە شەڕی دژی شێخ مەقسود ڕاگەیاندرا".
“ئەم گەمەو پیلانە ڕیشەیەکی قوڵی هەیە”
سیپان حەمۆ ئاماژەی بەوەدا، ئێستا جیهان (عەفرینو شێخ مەقسودو ئەشرەفیە) دەناسێت، ئەمەش بەرئەنجامی بەرخۆدانی ئەو هەرێمانەیە، سەلماندیان کورد هەر دەمێنێتو کوردیان لەدەوری یەکهەڵوێستییەک کۆکردەوە.
ئهوهشى وت، "بەم بۆنەیەوە، سڵاو لەهەڵوێستی باکورو هەولێرو سلێمانی دەکەم، ئەم هەڵوێستە نیشانیدا کە بەرژەوەندییە نەتەوەییەکانی کورد لەسەروی هەموو شتێکەوەیە، دەزگا میدیاییە خاوەن بیروڕا جیاوازەکان، بەیادکردنەوەی شەهیدان بەرنامەکانیان دەستپێکرد، کورد بەمجۆرەن، تەنانەت ئەگەر لەم گۆشەنیگایەشەوە سەیری بکەین، چەندە ئازارەکان گەورەن، بەڵام کەموکورتییمان هەیە، جەخت لەخۆڕەخنەکردن دەکەمەوە، ئەم بەرخۆدانە دەستکەوتی گەورەی هێنایە ئاراوە، خۆزگە دەرفەتمان هەبوایە نەهێڵین یەک بەرد لەنزیک خەڵکی عەفرین بکەوێتە خوارەوە، بەڵام بەداخەوە ئێمە لەنێو جیهانێکی زۆر پڕ لەگەمەو پیلانو بێبەزەییدا دەژین، ڕەگو ڕیشەی ئەم پیلانو گەمەیە زۆر قووڵە".
“تانکو درۆنی تورکی لەهێرشەکانی سەر شێخ مەقسود بەکارهاتن”
لەوەڵامی پرسیاری ئاخۆ هەسەدە دەیتوانیی دەستێوەردان بکات؟، سیپان حەمۆ وتی، "زیادو دەنیزو هەموو هەڤاڵانی دیكه، هەڤاڵی ئێمە بون، هەمومان سەر بەهەمان قوتابخانەین، لەهەمان شوێنەوە دێین، بەرخۆدانی شێخ مەقسود، بەرخۆدانی ئێمەیە، پێویست ناکات هەندێک دەستێوەردان بەئاشکرابکرێن، هەڵبەتە ئێمە هەڵسەنگاندن بۆ ئەمە دەکەین، کەموکورتیمان هەیە، ئەمەمان قبوڵە، لەمڕوەوە، ڕەخنەکانی گەلانی ئەشرەفیەو شێخ مەقسودو عەفرین لەجێی خۆیاندان، هەر وەڵامێکیان بدەینەوە، هێشتا کەمە، بێگومان خۆڕەخنەکردن دەبێت، بەڵام دەبێت بزانرێت، هەندێک دەستێوەردان دەبنە مایەی ناڕەحەتی گەورەتر، چەند نمونەیەکمان خستەڕوو، بۆ نمونە، دەوڵەتێک پشتگیریی لەهێرشەکەی حکومەتی دیمەشق کرد، بەڵام ئەمەی لەمیدیاکانەوە ڕانەگەیاند! دیسانەوە دەڵێم، ئەو درۆنو تانکانەی لەوێ بەکارهاتن، هی دەوڵەتی تورک بون".
“ڕێککەوتنی ئاگربەست لەگەڕەکەکان”
سەبارەت بەو ڕێککەوتنەی دوای شەڕەکە لەدوو گەڕەکەکە کران، سیپان حەمۆ وتی، "کاتێک هەڤاڵەکانمان بەرخۆدانیان کرد، ناچاربون ڕێککەوتن بکەن، ڕاگەیاندرا کە لەبەرامبەر کشانەوەی هێزە سەربازییەکاندا بەشێوەیەک ئاسایشی گەڕەکەکان مسۆگەر دەکرێت، ئەو بەڵێنە درا، دەمەوێت ئەمە بڵێم؛ ئەگەر ئەو هێزە نێوەندگیرانە ئەو بەڵێنانە جێبەجێنەکەن، ئەوان بەرپرسیار دەبن لەو کۆمەڵكوژییانە".
سیپان حەمۆ ئاماژەی بەشەڕی تایبەت لەمیدیای دیجیتاڵدا کردو وتی، "لەدیجیتاڵ میدیادا، ساختەکردنی ڕاستییەکانو درۆو چەواشەکاریی بەرفراوان هەیە، پێویستە پشتگیریی لەیەکتر بکەین، ئەگەر ئەمە بکەین، دەتوانین گەمەو پیلانەکانی سەر گەلی کورد تێکبکشێنین".
“ویستیان شەڕو ناکۆکیی نوێ لەنێوان کوردو عەرەب هەڵبگیرسێنن”
سیپان حەمۆ جەختیکردەوە، "لەڕێگهی هێرشی سەر شێخ مەقسودو ئەشرەفیەوە ویستیان شەڕو ناکۆکیی نوێ لەنێوان کوردو عەرەبدا هەڵبگیرسێنن، ئەمەی بەپیلانو یارییەکی مەترسیدار ناوبرد".
وتیشى، "هێشتا باوەڕمان بەدیموکراسیو ئیرادەی هەموو پێکهاتەکانی سوریا هەیە، دەمانەوێت پێکەوە لەسوریایەکی دیموکراتیک بەهەموو پێکهاتەکانەوە بژین، ئەوان بانگەشەی ئەوەدەکەن، دەمانەوێت هەندێک ناوچە داببڕین، بەم پاساوە هێرشدەکەنەسەرمان، نەخێر پێچەوانەکەی ڕاستە، ئێمە بەرگریی لەپێچەوانەکەی دەکەین، دەمانەوێت لەسوریایەکی دیموکراتیکدا هەموان بهگوێرهى ڕەنگو ئیرادەی خۆیان بژین، دەمانەوێت ئاشتیو سەقامگیریی بەرەوپێش ببەین، ئیدارەی خۆبەڕێوەبەریی باکورو ڕۆژهەڵاتی سوریا نمونەیە بۆ هەموو سوریا، هێشتا گرێدراوین بەم نمونەیەوە".
پەیوەندییەکانی نێوان هەسەدەو دیمەشق بەکوێدەگەن؟
ههر لهو چاوپێكهوتنهدا سیپان حەمۆ جهختیكردهوه، "ڕاستە هێرشی دڕندانەو نەژادپەرستانە بەرامبەر شێخ مەقسودو ئەشرەفیە ئەنجامدرا، بەڵام دڵی پێکهاتەکانی سوریا لەگەڵ هەردوو گەڕەکەکەدایە، زۆرکەس ویستیان پەیوەندیی بکەنو پشتگیریی خۆیان نیشاندا، سوننیو دروزو عەلەوییو مەسیحی، ئێمە هیچ ناکۆکییەکمان لەگەڵ کۆمەڵگەو پێکهاتەکانی سوریادا نییە".
سەبارەت بەوەی ئایا کۆبونەوەکانی نێوان هەسەدەو دیمەشق بەردەوامدەبن یان نا، سیپان حەمۆ نهیشاردهوه، "هێشتاش ئێشو ئازار دەچێژین، یادی شەهیدەکانمان دەکەینەوەو چارەسەری بریندارەکانمان دەکەین، هێشتا هەڵسەنگاندنمان بۆ ئەم بابەتە نەکردوە، بێگومان هەڵسەنگاندنێکی فەرمی بۆ دەکرێت، کامە هەڵوێست ڕاستو دروستبێت، ئەوە دەگیرێتەبەر".
“بەرگریی ئەرکی هەر تاکێکی کۆمەڵگەیە”
سیپان حەمۆ بۆچونى وایه، "لەماوەی ئەم 14 بۆ 15 ساڵەدا زیاتر لە 16 هەزار شەهید هەبوەو تا ئەندامێکیان بمێنێت تێدەکۆشنو گەلەکەیان دەپارێزن، لەکەسێتی زیاد حەلەبو دەنیزدا، دوبارە ئەمەمان بینی، بێگومان بەرگریی تەنها بەچەک نابێت، هەندێكجار بەسیاسەتو عەقڵ دەبێت، هەسەدە خاوەنی ئەم هێزەیە، لەهەرێمەکانی ئیدارەی خۆبەڕێوەبەری تا کۆتایی ئەم ئەرکە جێبەجێدەکات، دەبێت گەلەکەمان بزانێت کە ئێمە باوەڕمان بەکۆمەڵگەیەکی خۆپارێزە، نابێت ئێمە وەک هێزێکی جیاواز ببینن، ئێمە ڕۆڵەی ئەم گەلەین، ڕۆڵەی ئەم کۆمەڵگەیەین، ڕاستە، ئێمە لەبەرەکانی پێشەوە بەرخۆدان دەکەین، بەڵام بەرگریکردن ئەرکی هەموو تاکێکی کۆمەڵگەیە".
“دوا وتەی خۆیان بەئێمە وت”
سەبارەت بەپرسیاری “دوایین پەیامت بۆ زیاد حەلەبو دەنیز کە تەرمەکەی لەباڵکۆنەوە فڕێدرا، چییە؟، سیپان حەمۆ وتی، من تا دوا سات قسەم لەگەڵ زیاد حەلەب دەکرد، دوا وتەی ئەمە بوو (ئەگەر شەهیدبوم، داوای لێبوردن لەهەموان دەکەم، ئەمە دوا وتەی بوو بۆ ئێمە”.
