شارپرێس:

دوای ئەوەی پێنج حزبی رۆژهەڵاتی کوردستان هاوپەیمانێتییەکیان راگەیاند و هەڕەشەی هێرشکردنەسەر ئێرانیان کرد، وەزارەتی ناوخۆی حکومەتی هەرێم ڕونکردنەوەیەکی بڵاوکردەوە و دەڵێت، ڕێگە نادەن هیچ لایەنێک، هەرێمی کوردستان لە دژی هیچ وڵاتێکی دراوسێ بەکار بهێنێت .

وەزارەتی ناوخۆی حکومەتی هەرێمی کوردستان لەڕاگەیەنراوێکدا ئاماژەی بەوەکرد،" ئەمڕۆ چەند لایەنێک، ڕاگەیاندراوێکیان بڵاوکردەوە کە تێیدا هەڕەشەیان لە وڵاتێکی دراوسێ کردوە ، لەم ڕوەوە ، بە پێویستی دەزانین دوپاتی بکەینەوە کە هەرێمی کوردستان وەک هەمیشە فاکتەری سەقامگیریی و ئارامی بوە لە ناوچەکەدا ".

ئەوەشیخستەڕوو، هەرێمی کوردستان هیچ کاتێک سەرچاوەی هەڕەشە و مەترسیی نەووە بۆ ئاسایشی هیچ وڵاتێکی دراوسێ و ڕێگەش نادات، هیچ لایەنێک، هەرێمی کوردستان لە دژی هیچ وڵاتێکی دراوسێ بەکار بهێنێت .

ئەمەش لەکاتێکدایە، ئێوارەی ئەمڕۆ دوشەممە، هەریەک لە حیزبی دیموکراتی کوردستانی ئێران، پارتی ژیانی ئازادی کوردستان، پارتی ئازادی کوردستان، کۆمەڵەی زەحمەتکێشانی کوردستان و سازمانی خەبات، هاوپەیمانێتییەکان پێکهێنا و رایانگەیاند،" ئامانجە سەرەکی و هاوبەشەکانمان لەو هاوپەیمانییەدا خەبات بۆ ڕووخاندنی کۆماری ئیسلامیی ئێران ".