شارپرێس:

بەپێی ڕاپۆرتێکی ماڵپەڕی میدڵ ئیست ئای، وڵاتانی تورکیا، سعودیە، میسر و پاکستان خەریکی ڕاوێژن بۆ دامەزراندنی چوارچێوەیەکی ھاوکاریی ئەمنیی چوارقۆڵی کە ئامانجی ھەماھەنگییە لە پرسە بەرگرییەکان و بەرەنگاربوونەوەی ئاڵنگارییە ناوچەییەکان.

 وەزیرانی دەرەوەی ئەم چوار وڵاتە لە ڕیاز کۆبوونەتەوە و بۆ یەکەمجار بە شێوەیەکی بەکۆمەڵ باسیان لە پەرەپێدانی فۆرمێکی دامەزراوەیی کردووە کە بوارەکانی ئاڵوگۆڕی زانیاریی ھەواڵگریی، بەرەنگاربوونەوەی ھەڕەشە سنووربەزێنەکان و ھاوکاریی لە پیشەسازیی بەرگرییدا لەخۆدەگرێت.

دەشڵێت:  ئەم دەستپێشخەرییە وەک ھاوپەیمانییەکی سەربازیی پابەندکەر نابینرێت، بەڵکو سەکۆیەکی نەرمە بۆ یەکخستنی توانا خودییەکانی ئەم وڵاتانە لە سایەی ناسەقامگیرییەکانی ناوچەکەدا.

ئەوەش هاتووە: ڕاوێژەکان پرسی گرژییەکان لەگەڵ ئێران و دۆزینەوەی ڕێگەی هاوبەش بۆ کەمکردنەوەی مەترسییەکانی پێکدادانیان گرتووەتەوە، هەروەک لایەنەکان جەختیان لە گرنگی دروستکردنی متمانە و کەناڵی پەیوەندیی بەردەوام کردۆتەوە بۆ چەسپاندنی سەقامگیری.

هەرچەندە ئەم پرۆژەیە هێشتا لە قۆناغی سەرەتاییدایە و بە فەرمی ڕانەگەیەندراوە، بەڵام نیشاندەری ئاراستەیەکی نوێیە بۆ دروستکردنی جەمسەرێکی کاریگەر لە جیهانی ئیسلامییدا بەرامبەر گۆڕانکارییە جیۆپۆلیتیکییە خێراکان.

ئاکۆ عەبدوڵڵا ئاڵی