شارپرێس:
بەڕێوەبەری گشتیی بازرگانی هەرێم دڵنیایی دەداتە هاوڵاتییان و دەڵێت، بەهۆی راگەیاندنی ئاگربەست لەنێوان ئەمریکا و ئێران سەرجەم دەروازە سنوری و فڕۆکەخانەکان دەکرێنەوە و هاتوچۆی بازرگانی ئاسایی دەبێتەوە، بەهۆیەوە نرخی کاڵا و خۆراکیش دادەبەزێت.

نەوزار شێخ کامل، بەڕێوەبەری گشتیی بازرگانی هەرێم لەلێدوانێکدا بۆ کەناڵی ڕوداوی نزیک لە پارتی ئاماژەی بەوەکردوە،" ئێستا هەموو رێگاکان بۆ هێنانی خۆراک و کەلوپەل کراوەن و دۆخەکە بەتەواوی ئاسایی بوەتەوە ".

ئەوەشیخستەڕوو، "پێویست بەوە ناکات خەڵک خواردنی زیادە لە ماڵەوە هەڵبگرێت، چونکە زۆربونی خستنەڕوی کاڵا دەبێتە هۆی ئەوەی لە ئایندەیەکی نزیکدا نرخی کەلوپەل و خۆراک دابەزێت و بازاڕ هاوسەنگ بێتەوە." 

بەڕێوەبەری گشتیی بازرگانی هەرێم باسی لەوەشکرد،" لەو ماوەیەشدا کە هاتوچۆ کەم بوو، ئێمە هیچ کێشەیەکی خۆراکمان نەبوو و خۆراکی پێویستمان لە کۆگاکاندا هەبوە."