شارپرێس:
لەگەڵ هەڵکشانی گرژییە جیۆپۆلیتیکییەکانی ئەم دواییە، کۆمپانیاکانی پیشەسازیی بەرگریی ئەمریکی وەک یەکێک لە سوودمەندە سەرەکییەکانی شەڕی دژ بە ئێران دەرکەوتن، بەو پێیەی لە مانگەکانی ڕابردوودا بەرزبوونەوەیەکی بەرچاویان لە داهات و داواکارییە سەربازییەکاندا تۆمار کردووە و قەبارەی فرۆشیان گەیشتووەتە 400 ملیار دۆلار.
 بەپێی ڕاپۆرتەکانی ڕۆیتەرز و وۆڵ ستریت جۆرناڵ، داواکاریی لەسەر کەرەستەی سەربازیی بەهۆی شەڕی ڕۆژهەڵاتی ناوەڕاست و ململانێ بەردەوامەکانی ئۆکرانیا و گرژییەکانی ڕووسیا و چین زیادی کردووە، ئەمەش وای کردووە حکومەتەکان خەرجییە بەرگرییەکانیان زیاد بکەن بۆ قەرەبووکردنەوەی کۆگاکان و خۆئامادەکردن بۆ هەر پەرەسەندنێکی چاوەڕوانکراو.
کۆمپانیا گەورەکانی وەک RTX و نۆرسرۆپ گرومان و لۆکهید مارتن و جەنەراڵ ئەلیکتریک ئایرۆسپەیس گەشەیەکی ڕوونیان لە فرۆشتندا ڕاگەیاندووە، بەتایبەت لەسەر موشەک و سیستەمەکانی وەک پاتریۆت و ساد، لەگەڵ فڕۆکە جەنگییەکانی F-35 و F-16. کۆمپانیای RTX لە چارەکی یەکەمی 2026دا بڕی 22.1 ملیار دۆلار فرۆشی هەبووە کە 9% زیادی کردووە و کۆی داواکارییەکانی گەیشتووەتە 271 ملیار دۆلار.
هەروەک داهاتی جەنەراڵ ئەلیکتریک 25% زیادی کردووە و گەیشتووەتە 12.4 ملیار دۆلار، لە کاتێکدا نۆرسرۆپ گرومان 9.9 ملیار دۆلار و لۆکهید مارتن نزیکەی 18 ملیار دۆلاریان بەدەستهێناوە. ئەم ئەنجامانەش هاوکاتن لەگەڵ ڕێککەوتنی نوێی بەرپرسانی ئەمریکا بۆ زیادکردنی بەرهەمهێنانی موشەکەکانی تۆماهۆک و پاتریۆت.
 کریس کالییۆ، بەڕێوەبەری جێبەجێکاری RTX، ئاماژەی بەوە کردووە کە لەگەڵ پنتاگۆن کار دەکەن بۆ خێراکردنی بەرهەمهێنانی تەقەمەنییەکان. شارەزایان دەڵێن شەڕی ئێران کورتهێنانی خێرای لە کۆگاکاندا نیشان داوە، ئەمەش وای کردووە ئەمریکا و ئەوروپا پەنا بۆ پڕچەککردنەوەی خێرا ببەن.
لە لایەکی دیکەوە، ئەم بازدانە داراییە مشتومڕی لە ناوخۆی ئەمریکا دروست کردووە سەبارەت بە هەژموونی کۆمەڵگەی پیشەسازیی سەربازیی و کاریگەریی کۆمپانیاکانی چەک لەسەر بڕیارە سیاسییەکان و خەرجییە بەرگرییەکان لە ڕێگەی گروپەکانی گوشارەوە.


ئاکۆ عەبدوڵڵا ئاڵی