شارپرێس:
فەرماندەی گشتیی هێزەکانی سوریای دیموکرات مەزڵوم عەبدی، و هاوسەرۆکی فەرمانگەی پەیوەندییەکانی دەرەوەی ئیدارەی خۆبەڕێوەبەریی ئیلهام ئەحمەد، لەگەڵ شاندێکی کۆمیتەی ئاوارەکانی سەرێکانیێ کۆبوونەوە.
لەکۆبوونەوەکەدا، دوای گوێگرتن لە کۆمیتەکە و داواکارییەکانیان، گفتوگۆ لەبارەی ڕەوشی گشتیی شارەکە و گوندەکانی، بارودۆخی ئاوارەکان و میکانیزمەکانی ڕێکخستنی گەڕانەوەیان کرا.
مەزڵوم عەبدی ڕایگەیاند، دۆسیەی ئاوارەکانی سەرێکانیێ لە سەرجەم کۆبوونەوەکانیاندا لەگەڵ لایەنە پەیوەندیدارەکاندا دەخرێتە بەرباس و بەردەوام کاری لەسەر دەکرێت بۆ گەرەنتی گەڕانەوەی دانیشتووانی سەرێکانیێ بۆ شارەکە و گوندەکانیان، بە شێوەیەکی ئارام و سەربەرزانە و بەبێ هیچ مەترسییەک.
لەکۆبوونەوەکەدا ئامادەبووان جەختیان لەسەر پێویستیی زیاترکردنی هاوئاهەنگی و کاری هاوبەش کردەوە لەپێناو خێراکردنی هەنگاوەکانی گەڕانەوەی ئاوارەکان.
هەروەها ڕێککەوتن کرا لەسەر بەدواداچوون بۆ کاری هاوبەشی نێوان کۆمیتەی ئاوارەکانی سەرێکانیێ و سەرجەم لایەنە پەیوەندیدارەکان لە قۆناغی داهاتوودا.