شارپرێس:
ئیبراهیم عەزیزی، سەرۆکی لێژنەی ئاسایشی نەتەوەیی لە پەرلەمانی ئێران، ڕایگەیاند کە تاران میکانیزمێکی بۆ ڕێکخستنی هاتوچۆی دەریایی بە درێژایی ڕێڕەوێکی دیاریکراو لە گەرووی هورمز ئامادەکردووە و بەم زووانە ئاشکرای دەکات.
عەزیزی ئاماژەی بەوەش کردووە کە تەنیا ڕێگە بە کەشتییە بازرگانییەکان و ئەو لایەنانە دەدرێت کە هاوکاریی ئێران دەکەن سوود لەم میکانیزمە وەربگرن و لە بەرامبەر پێشکەشکردنی خزمەتگوزارییە پسپۆڕییەکاندا ڕسوومات وەردەگیرێت.
ئەو بەرپرسە ئێرانییە جەختی کردۆتەوە کە ئەم هەنگاوە لە چوارچێوەی سەروەریی نیشتمانیی و دەستەبەرکردنی ئاسایشی بازرگانیی نێودەوڵەتییدایە، بەڵام ڕێڕەوەکە بە ڕووی بەشداربووانی پڕۆژەی ئازادی ئەمریکییدا دادەخرێت.
لە دوای دەستپێکردنی شەڕ لە 28ی شوباتەوە، ئێران کۆنترۆڵی خۆی بەسەر گەرووی هورمزدا توندتر کردووە و سوپای پاسداران تەنیا ڕێگەی بە ژمارەیەکی سنووردار لە کەشتییەکان داوە تێپەڕن.