شارپرێس:
دەستەی ڕاگەیاندن و پەیوەندییەکانی عێراق، بڕیاریدا گرێبەستەکەی لەگەڵ کۆمپانیای کۆڕەک تیلیکۆم هەڵبوەشێنێتەوەو دەڵێت، کۆمپانیاکە پابەند نەبوە بە گرێبەستەکان و دانەوەی قەرزەکانی.

دەستەی ڕاگەیاندن و پەیوەندییەکانی عێراق لەڕاگەیەنراوێکدا ئاماژەی بەوەکرد،" سەرباریی ئەوەی مۆڵەت و دەرفەتی پێویست بە کۆمپانیای کۆڕەک تیلکۆم درا بۆ ئەوەی دۆخی یاسایی خۆی رێکبخاتەوەو پابەندبوونە دارایی و یاساییەکانی جێبەجێ بکات، بەڵام کۆمپانیاکە بەندەکانی گرێبەستەکانی جێبەجێ نەکردوەو بەهۆیەوە سەرجەم کارەکانی راگیراوە".

دەستەی راگەیاندن و پەیوەندییەکان راشیگەیاند،  دەست دەکەن بە گرتنەبەری ڕێکارە یاسایی، ڕێکخستن و هونەرییەکان بەرامبەر بە سامان و سەرمایەی کۆمپانیاکە، ئەمەش لەپێناو پاراستنی مافی دەوڵەت، هاوڵاتییان و سامانی گشتیدا.

رونیشیکردەوە، ئەم بڕیارە پاڵپشت بە بڕگەکانی (12، 13، 15، 16)ی ماددەی پێنجەم لە گرێبەستی ڕێککەوتنی نێوانیان دراوە.

دەستەی ڕاگەیاندن و پەیوەندییەکان باسی لەوەشکرد، بە هەماهەنگی لەگەڵ لایەنە پەیوەندیدارە ناوخۆیی و نێودەوڵەتییەکان، بەدواداچون بۆ لێکەوتەکانی ئەم بڕیارە دەکەن بۆ وەرگرتنەوەی قەرزەکان و سەپاندنی پابەندبونەکان بەسەر کۆمپانیاکەدا.

لە کۆتایی راگەیەنراوەکەدا، دەستەی ڕاگەیاندن و پەیوەندییەکان داوا لە سەرجەم دامەزراوە فەرمی و نافەرمییەکان و هاوڵاتییان دەکات پابەندی بەم بڕیارە بن و هیچ جۆرە مامەڵە و گرێبەستێکی نوێ لەگەڵ ئەو کۆمپانیایە نەکەن، جەختیش دەکاتەوە کە کۆمپانیای کۆڕەک بەتەواوی بەرپرسیارێتییە یاسایی و داراییەکانی لێکەوتەی ئەم بڕیارە لە ئەستۆ دەگرێت