شارپرێس:
لێكۆڵینەوەكان ئاماژە بەوە دەكەن كە گەشتبینی پەیوەندیدارە بە كەمبوونەوەی مەترسییەكانی نەخۆشییەكانی دڵ و مردن، بەڵام هیچ بەڵگەیەك نییە بسەلمێنێت بیركردنەوەی ئەرێنی بە تەنیا تەمەن درێژ دەكات؛ چونكه فاكتەری تری وەك چالاكی جەستەیی، خۆراك، خەو، جگەرەكێشان و باری تەندرووستیی تێكەڵ بەم بابەتە دەبن.

 
شیكارییەكی هەمەلایەنە لە گۆڤاری "JAMA Network Open" كە زیاتر لە 229 هەزار كەسی گرتۆتۆتەوە، دەرخەری پەیوەندی نێوان گەشتبینی و كەمبوونەوەی مەترسیی نەخۆشییەكانی دڵ و مردن بووە بە هەر هۆكارێك. شیكارییەكی تریش لەسەر 181 هەزار كەس بە هەمان ئەنجام گەیشتووە.

كەمبوونەوەی فشار و باشتربوونی ڕەفتارە تەندروستییەكان هۆكاربن بۆ ئەم پەیوەندییە؛ چونكە كەسانی گەشتبین زیاتر بایەخ بە وەرزش، خۆراكی تەندرووست، پابەندبوون بە دەرمان و دووركەوتنەوە لە ڕەفتاری زیانبەخش دەدەن.

گەشتبینی بە مانای پشتگوێخستنی كێشەكان یان نكۆڵیكردن لە نەخۆشیی نییە، بەڵكو ڕووبەڕووبوونەوەی دۆخە سەختەكانە بە سەرنجدان لەسەر چارەسەر نەك چاوەڕوانكردنی خراپترین ئەنجام.

نەریتە پاڵپشتەكانی تەندرووستیی دەروون و دڵ بریتیین لە: وەرزشكردن، خەوی پێویست، پاراستنی پەیوەندییە كۆمەڵایەتییەكان، كەمكردنەوەی فشار، كۆنتڕۆڵكردنی پەستانی خوێن و شەكر و كۆلیستڕۆڵ، و دووركەوتنەوە لە جگەرەكێشان.

سەبارەت بە وتەی جێڕیمی لەندەن (پزیشكی نەشتەرگەری دڵ) كە دەڵێت گەشتبینەكان تەمەنیان 15% درێژتر دەبێت؛ ئەمە لە تۆڕە كۆمەڵایەتییەكان و لەلایەن ڕۆژنامەی "هیندۆستان تایمز" بڵاوكراوەتەوە، نەك وەك ئەنجامی توێژینەوەیەك كە بسەلمێنێت گەشتبینیی هۆكاری ڕاستەوخۆی درێژبوونی تەمەنە.