ترسناكترین ژنی ناو داعش.. دان بەوەدا دەنێت ساڵی ٢٠١٦ پلانی هێرشی كیمیایی بۆ سەر بەغدا هەبووە

sharpress.net

1390 جار خوێندراوه‌ته‌وه

19/09/2019‌

شارپرێس:
بەپێی دەزگا ئەمنییەكانی عێراق، "ئەبرار كوبەیسی"، كە وەك "ترسناكترین ئافرەت"ی داعش ناسراوە و ئێستا لای هەواڵگری عێراق دەستگیركراوە، لەساڵی ٢٠١٦ پلانی بۆ سێ هێرشی كیمیایی بۆ سەر شاری بەغدا داناوە.

ئەو زانیارییانەش لە دانپێدانانەكانی ئەو ژنە دەستگیركراوەی داعشدا هاتووە، كە لەكاتی لێكۆڵینەوەی شانەی هەواڵگری هەڵۆكانی سەر بەوەزارەتی ناوخۆی عێراق ئاشكرایكردووە‌و رۆژنامەی "سەباح"ی نیمچەفەرمی عێراقیش بڵاویكردووەتەوە.

بەپێی دانپێدانانەكانی ئەبرار، بەدیاریكراوی لەساڵی ٢٠١٦ گەیشتووەتە ئەو بڕوایەی خۆی بۆ كردەوەیەكی خۆكوژی ئامادە بكات بۆ بەئامانجگرتنی یەكێك لەو دوو ئامانجە، یان دەزگا ئەمنییەكان، یان ناوچەیەكی گردبوونەوەی دانیشتووان بەتایبەتی لەبەغدای پایتەخت، بەڵام دواتر بیری لەوە كردووەتەوە شارەزاییەكەی لە پرۆسەی كیمیایی و بایۆلۆجی بەشێوەیەكی دڕندانە بەكاربهێنێت.

ژنە دەستگیركراوەكەی داعش لەدانپێدانانەكان وتوویەتی: "بڕیارمدا ماددەی ژەهراوی ریسین لەماڵەكەی خۆمدا درووست بكەم، تا بتوانم لەڕێگای ئەو ماددە ژەهراوییەوە تاوانی كۆمەڵكوژی ئەنجام بدەم، ئەوەش لەپێناو رەزامەندی و دڵخۆشكردنی رێكخراوی داعش". 

سەبارەت بە هێڵە كردەییەكانی پرۆسەكە لەدانپێدانانەكاندا باس لەوە كراوە، كە لەناوەراستی ساڵی ٢٠١٦ بڕیار لەسەر پرۆسەكە دراوە، بەجۆرێك لە ساتەدا بەغدای پایتەخت لەژێر هەڕەشەی ماددە ژەهراوییەكاندا بووەو سەركردەكانی داعشیش گوێیان بۆ رووداوەكە هەڵخستبوو، لەكاتێكدا خەڵكی بەغدا خەریكی بەڕێكردنی ژیانی ئاسایی خۆیان بوون، كە ئەوەش هاوكات بوو لەگەڵ گەیشتنی سێ وەجبەی ماددە كیمیاییەكان بۆ بەغدا.

لەدرێژەی دانپیدانانەكەیدا ئەو دەشڵێت "دوای ئامادەكارییەكان بۆ جێبەجێكردنی پلانەكە و هەوڵدان بۆ كوشتنی زۆرترین كەسی مەدەنی، لەگەڵ بوونی ڕێنمایی لەلایەن سەركردەكانی داعشەوە بەوەی لەهێرشەكاندا ئەو شوێنانە بەئامانج بگیرێن، كە لەرووی تایفییەوە دەستنیشنكراون" .

ئەبرار كوبەیسی لەساڵی ١٩٨٧ لە بەغدا لەدایك بووە و دانی بەوەداناوە لەیەكەم هەنگاویداو لەساڵی ٢٠١٠ ماددەی "ریسین"ی لە تاقیگەیەكی سادەی ماڵەكەی خۆی لە بەغدا بەرهەمهێناوە، هەروەها وتوویەتی: دوای كۆتاییهاتنی كارەكەی لەیەكێك لەبەشی بایۆلۆژی و كیمیاییەكانی لە وەزارەتی زانست، خۆی تەرخانكردووە بۆ لیكۆڵینەوە و بەدواداچوون بۆ بەرنامە كیمیاییە بچووكەكەی".

كوبەیسی ئەوەشی وتووە: شارەزاییە زۆرەكەی لەو بوارەدا دەرفەتی ئەوەی بۆ رەخساندووە هەندێك لە خەونەكانی بەدیبهێنێت لەتاقیكردنەوە لەسەر هەندێك ماددەی كیمیایی لە تاقیگەكەیدا تائەوكاتەی لەساڵی ٢٠١٦ گەیشتووەتە قۆناغێك بتوانێت تاوانەكەی ئەنجام بدات ئەوەش دوای ئەنجامدانی یەكێك لەهێرشەكانی لە ناوچەی قائیم تا بتوانێت ژمارەیەكی زۆرتری خەڵكی مەدەنی لەبەغدا بكوژێت.

ئامادەكردن: ئاكۆ عەبدوڵڵا ئاڵی







ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved