ئیبراهیم عەلیزادە: كۆماری ئیسلامی هیچ دەرفەتێك بە نەیارەكانی نادات

کوردستان

01/11/2019‌ 1187 جار خوێندراوه‌ته‌وه

شارپرێس:
سكرتێری رێكخراوی كوردستانی حیزبی كۆمۆنیستی ئێران باس له‌دانوستانی حزبه‌كانی ڕۆژهه‌ڵات له‌گه‌ڵ كۆماری ئیسلامی ئێران و ڕۆڵی حزبه‌كه‌ی ئه‌وان له‌و دانوستانانه‌ باسده‌كات.

لەلایەن ئیبراهیم عه‌لیزاده‌، سكرتێری رێكخراوی كوردستانی حیزبی كۆمۆنیستی ئێران وه‌ڵامی پرسیاری شارپرێس-ی له‌باره‌ی دانوستانی حزبه‌كانی ڕۆژهه‌ڵاتی كوردستان دایه‌وه‌.

شارپرێس: دەنگۆی ئەوە هەیە كە لە نێوان چوار حیزبی كوردستانی كە لە ناوەندی هاوكاریدا كۆبونەتەوە و كۆماری ئیسلامی ئیران گه‌ڕێكی نوێی گفتوگۆی ده‌ستپێكردوه‌ته‌وه‌، وردەكاریەكانی  ئەو دانیشتنە چیە؟

ئیبراهیم عەلیزادە:  ئەو حیزبانەی كە ئێوە ناوتان برد تا ئێستا بە شێوەی رەسمی لێدوانێكیان لەم بابەتەوە نەداوە، بەڵام بە پێی ئەو هەواڵانەی كە بە شێوەی نارەسمی لێرەوە لەوێ قسەی لێدەكرێت و بە رلەبەرچاوگرتنی پێشینەی ناشەفافی دو دانیشتنەكەی پێشوی ئەوان، كە لە سەرەتاوە رەتیان دەكردەوە و دواجاریش كە بە شێوەیەك لە شێوەكان دانیان پێدانا، پێدەچێ‌ ئەو دانیشتنە رووی دابێت. پێشینەی مەسەلەكەش دەگەرێتەوە بۆ نیوبژیوانی رێكخراوێكی ناحكومی نه‌روێژی بە سه‌رپه‌رشتی وەزارەتی دەرەوەی ئەو وڵاتە. محەمەد جەواد زەریف وەزیری دەرەوەی كۆماری ئیسلامی،  لە پەراوێزی پرێس كونفرانسێكدا دانی بە بونی وەها گفتوگۆیەك داناوە.  ئاشكرایە كە  لە دوو دەوری پێشووی گوفتوگاندا رێكەوتنێك لە ئارادا نەبۆە. چونكە لە راستیدا كۆماری ئیسلامی بە مەبەستی رێكەوتن لە گەل ئەوان دانه‌نیشتوه‌، به‌گوێره‌ی زانیارییه‌كانی ئێمه‌ وەفدی ئیرانی پێی گوتون كە كۆماری ئیسلامی ئیران تەنها لە چوارچیوەی" دەستور"  واتە قانونی ئەساسی ئیران دا ئامادەیە لە گەڵیان هەلسوكەوت بكات. هەموان دەزانن كە هەر بە پێی ئەو دەستورەشە كە كۆماری ئیسلامی 40 ساڵە نەیارانی خۆی لە ئێران و كوردستان سەركوت دەكات. ئەگەر ئەو دەنگویە ڕاست بێت، بە واتای ئەوەیە كە ئەوە پرۆژەی كۆماری ئیسلامی بۆ لەباربردنی خەباتی رزگاری خوازانەی خەلكی كوردستان بەرەو پێش چۆە و نەك ئامانجەكانی ئەم چەند حیزبە.

شارپرێس: هەڵویستی ئێوە بەرانبەر بەم گفتوگۆیانه‌ چییە و بۆ تیایدا بە شدار نین؟

ئیبراهیم عەلیزادە: ئێمە ئەو ده‌رفه‌ته‌ لە كۆماری ئیسلامیدا نابینین كە نە رێگای چالاكی سیاسی و قانونی بە هیچ رێكخراوێكی سیاسی نەیاری خۆی بدات و نە دان بە مافەكانی پێشێلكراوی خەَلكی كوردستان دابنێت. نە لە رابردودا بویەتی و نە ئێستاش هیچ نیشانەیەك دەبیندرێت كە ئەو زەرفیەتەی پەیدا كردبێت. هاوسەنگی هێزی نیوان ئەو حیزبانە و كۆماری ئیسلامیش لە ئاستێك دانییە كە بڵیێن جەبری زەمانە هێناویەتە بەردەم مێزی دانوستان. هەربۆیە ئیمە بە پیلانێكی دەزانین هەر وەكوو لە رابردوودا لێمان دیوه‌،  
بەڵام سەرەرای ئەوە، دوو بابەت دەتوانێ بۆ وەها گفتوگۆیه‌ك هەبێت، یەكیان گفتوگۆ لە سەر بەرژەوەندیەكانی حیزبی، وەكوو خەباتی چەكداری، فەعالیەت لە چوارچێوەی كۆماری ئیسلامیدا، بەشداری كردن لە هەلبژاردن و بابەتی دیكەی لەم چەشنە كە ئەوانە پێوەندی بە حزبەكەی خۆیانەوە هەیە و مافی خۆیانە، هەر بەڵایەك بە سەریان بێت یان هەر دەسكەوتێك بۆ حزبه‌كەیان بە دەست بێنن، لە چاكە و خەراپەی خۆیان بەرپرسن. ئیمە ناڵێین مافی ئەوتان نییە لە سەر ئەم بابەتانە رێبازی و جیهەتی تایبەت بە خۆتانتان هەبێت و لە پێناویدا لەگەڵ كۆماری ئیسلامی گفتوگۆ بكەن. ئەگەر به‌پێویستمانزانی و بۆ رون كردنەوەی بیرورای گشتی و بردنە سەری رادەی ووشیاری جەماوەر لەم بابەتەوە قسەی خۆمان دەكەیەن، بەڵام بابەتی دووهەم گفتوگۆ لە سەر چارەنوسی خەڵكی كوردستان، مافەكانی خەڵكی كوردستان و داخوازیە گشتیەكانی ئەو خەڵكەیە. لێرەدا ئێمە دەڵێین مافی ئەوەیان نییە لە سەر  كۆمەڵگای كوردستان و داهاتوەكەی، دانوستان بكه‌ن بۆ چارەنوسی حیزبەكەی خۆیان هەر بریارێك دەدەن با بیدەن ئێمە لەگەڵ ئەو مەسەلەیە كێشەیەكمان نییە، بەڵام كێ مافی ئەوەی پێداون لە سەر چارەنوسی خەلكی كوردستان بریار بدەن؟ ئەو نوینەرایەتێیان لە كێ وه‌رگرتووه‌؟

ئەگەر رۆژێك لە رۆژان لە ئاكامی هاوسەنگی هێز و بە پێی هەلومەرجێكی دیاری كراو، بارودۆخی دانوستان لەگەڵ دوژمن پێك هات، ئەو جار مەسەلەی دیاریكردنی دەستەی دانوستانكار، كە بە شێوەیەك لە شێوەكان لە لایەن جەماوەری خەڵكی كوردستانەوە متمانەی پێدرابێت دێتە گۆرێ‌، پێویستە ئەو حیزبانەی كە دەچنە گفتوگۆوه‌ لەگەڵ كۆماری ئیسلامی رادەی مافی خۆیان بناسن، ئەوان بۆیان نییە بە نوێنەرایەتی لەلایەن خەڵكی كوردەوە دانوستان بكه‌ن. بە خۆشحاڵیه‌وه‌ ئێستا جەماوەری خەڵكی كوردستان لەم بابەتەوە ووشیارن و گەلێك ئەزمونی بەنرخیان لەم بابەتەوە هەیە و مو لە ماست دەكێشن و ئەگەر ئەو حیزبانە تووشی وەها هەڵەیەك بن، بێگومان خەڵكی كوردستان لێیان قبوڵ َناكەن.

ڕ . ج