ئەستێرەیەکی سینەمای هیندی رۆژانە میزی مانگا دەخواتەوە

هەمەڕەنگ

14/09/2020‌ 118 جار خوێندراوه‌ته‌وه

شارپرێس:
ئەکشای کۆماری ئەستێرەی سینەمایی هیندی ئاشکرای کردووە کە بەهۆی سوودە تەندروستییە زۆروزەوەندەکانییەوە رۆژانە میزی مانگا دەخواتەوە .

ئەو ئەستێرە سینەماییەی هیندستان لایەنگرێکی سەرسەختی پارتەکەی ناریندرا مۆدی سەرۆکوەزیری توندڕەوی هیندۆسییە، کە ملیۆنان دۆلار خەرج دەکات بۆئەوەی ئەو بەرهەمانە پەرەپێبدات کە لە میز یان پاشەڕۆکی مانگ درووست دەکرێن و بەلای هیندۆسەکانەوە پیرۆزن .

کۆماری تەمەن ٥٣ ساڵ ، لەڕێگای بەرنامەی تەلەفزیۆنی سەرکەشیی بەریتانی بیر گریلەر رایگەیاند کە بروای وایە ئەو بەرهەمانەی لە میز یان پاشەڕۆکی مانگا درووست دەکرێن بەسودن بۆ بەرەنگاربوونەوەی نەخۆشیی شەکرە و شێرپەنجە، جگە لەوەی بۆ درووستکردنی هەویری ددانیش سوودیان لێوەردەگیرێت، لەکاتێکدا هێشتا هیچ لێکۆڵینەوەیەکی زانستی ئەو سوودە پزیشکیانەی نەسەلماندووە .

کۆمار رایگەیاندووە کە هیچ هەست بە دوودڵی ناکات و بەهۆی سوودە تەندرووستییەکانی کە لە پزیشکی کلاسیکی هیندیدا ئاماژەی بۆکراوە، رۆژانە میزی مانگا دەخواتەوە  ، وتوشیەتی هەر ئەوە هۆکاری ئاسوودەییەتی لەژیانیدا .

بەشێکی زۆری هیندییەکان لەبەر سوودە پزیشکییەکانی میزی مانگا دەخۆنەوە، هەروەک چۆن پارتی مۆدی "بەهاراتا جاناتا" داوا دەکات هاوڵاتیانی هیندستان بۆ خۆپاراستن لە ڤایرۆسی کۆڕۆنای نوێ میزی مانگا بخۆنەوە .

لەمانگی ئازاری رابردوو ، ڕێکخراوی " The India Hindu Mahasabha" لە شاری نیودەلهی پایتەختی ئەو وڵاتە ، ئاهەنگێکی بۆ برەودان بە خواردنەوەی میزی مانگا ڕێکخست ، تاوەکو وەکو چەکێک دژ بە ڤایرۆسی کۆڕۆنا بەکاربهێنرێت .
وەرگێڕان : ئاکۆ ئاڵی