شارپرێس:
یەکڕیزی ئەو دەستەواژەیەیە کە نەوەی رابردوو و ئێستا بەردەوام گوێیان لێی بوە، بەڵام تا ئێستا بە واقیعیبەرجەستەیان نەکردوەو و پێدەچێت نەوەی داهاتوی نیشتمانیش وەک نەوەی ئێستا بەو خەونەوە تەمەنێک بەرێبکەن و نەبینن ئەو یەکڕیزییە هەوێنی سەرکەوتنی دۆزی کورد بێت.
یەکڕیزیی وەك چەمكێك ئاوێتە كراوە لەگەڵ پرسە نەتەوەیی نیشتیمانیەكان، هەركاتێك سەركردایەتی سیاسی كورد لەسەر ئاستی ناوخۆ دەرەوە، ناوچەكە و تەنانەت عێراقیش دۆخیان خراپ دەبێت و دەكەونە تەنگژەوە، جارێكی تر یەكڕیزی كورد، یەكڕیزی لایەنەكان و یەكڕیزی هێزە كوردییەكان دەبێتەوە بەبابەتی ڕۆژ و دەبێتەوە بەكارتی بەردەم ئەوسیاسیانەی كە بەدرێژای سی ساڵی ڕابردوو كارەسات بەدوای كارەسات بەسەر كورد و دۆزی كوردا هێناویانە.
دەستەواژەی یەكڕیزی كە گوتاری هەموو هێزە سیاسیەكانی باشوری كوردستانە و وەک یەکێک لە ئامانجە سەرەکیەکانیان ناوی دەبەن، دەوترێت لەبنەڕەتدا دروشمێكە بۆفریودانی تاك و كۆی كۆمەڵگای كوردی بەكاردێت، ئەگەر سەیری مێژوی پەنجا ساڵی ڕابردووی تەواوی حزبە سیاسیەكانی کوردستان بكەیت بەئاشكرا دەبینی لەپاڵ دروشمی یەكریزیدا شەڕی ناوخۆ، دیل كوشتن و یەكتر سڕینەوە بەرهەم هاتوەو لە پێناو بەدەستهێنانی دەسەڵات و پاوانخوازی زیاتردا هەمیشە یەکڕیزی و تەبایی نێوان حزبەکان و لەڕێگەی ئەوانیشەوە یەکریزی کۆمەڵگەو ئاشتیی کۆمەڵایەتی تێکدراوەو هەر لایەنەو ئەوی تری تاوانبار کردوە بە تێکدانی یەکڕیزیەکەو نانەوەی ئاژاوەو دووبەرەکی.
بەردەوام ئەو کاتانەی کە هەرێمی کوردستان لەبەردەم پێشهاتێکی نوێ یان ریککەوتن و هەلبژاردن، یان دانوستانی چارەنوسسازدا بوبێت لەگەڵ حکومەتی ناوەند و هەر لایەنێکی دەرەکی، گەرمترین باس و خواس باسی یەکڕیزی و پێکەوە کارکردن بوە، لەکاتێکدا کە لە ناوخۆدا لەوپەڕی پەرتەوازەیی و لێکدابراندا بوین، بەڵام کەمترین کات توانراوە بە یەک ئاست کار بکرێت و هێزەکان پیکەوە کۆک بن لەسەر بابەتە هەستیارەکان.
هەموو کاتیش دوای ئەو پەرتەوازەییە و دەرکەوتنی کاریگەرییە نەرێنیەکانی ئەو پەرتەوازەییە هێزەکان لەڕێگەی کادر و پەرلەمانتار و بەرپرسانیانەوە کەوتونەتە هۆنینەوەی جۆرەها ناو و ناتۆرە و تەخوینکردن و داتاشینی جۆرەها نازناوی ناشایستەو دور لە ئەتەکێتی گفتوگۆ بەرامبەر یەکتر و هەر کەسەو بەرامبەرەکەی بەهۆکاری تێکدانی یەکڕیزی و تەبایی تاوانبار دەکات.
ئێستاو دوای سی ساڵ حوکمڕانی، لەکاتێکدا کە حکومەتی هەرێم بە هەموو واتایەک شکستی هێناوە لە بەڕێوەبردنی هەرێم و توانای ئیدارەدانی وڵاتی نەماوەو دەستەوەستان تەنها چاوەرێی بەغدایە موچە و قوتی هاوڵاتیانی هەرێم بنێرێت، لایەنە کوردیەکان لەو پەڕی پەرتەوازییدان و توانای دۆزینەوەی هیچ رێگەچارەکەیان نییە بۆ ئەم دۆخە و ناتوانن لەسەر مێزیک کۆ ببنەوە و پێکەوە و بە یەکڕیزی هەنگاو بنین بە ئاراستەی چارەسەر.
ئەو کاتانەشی کە بریارە هەموان لەسەری مێزێک کۆ ببنەوە، دیسانەوە لیدوان و کارە دژ بە یەکەکان دەبنەوە بە هۆی تێکدانی ئەو یەکڕیزیەی کە ئومێدی لەسەر هەڵچنراوە لەلایەن هاوڵاتیانەوە.
ئێستا کاتی ئەوەی بپرسین کورد کەی دەتوانیت یەکڕیز بێت و پێکەوەو بە تەبایی ڕوبەڕوی هەر دۆخێک ببێتەوە کە دێتە بەردەمی؟
ئاخۆ هاوڵاتیانی هەرێم تا کەی قبوڵی دەکەن لەم هێزانە کە بەوجۆرەو هەر جارەو لەژێر ناوێکدا یەکڕیزی ماڵی کورد تێکبدەن و کۆمەڵگە دابەشبکەن بەسەر چەند بەرەیەکی دژ بە یەکداو لەدژی یەک بەکاریان بهێنن ولە پیناو بەدەستهێنانی ئامانجە حزبی و کەسیەکانی خۆیان و کۆمەڵگەش باجەکەی بدات.
