شارپرێس: كەنداڵ جودی

بەرپرسێكی كوردی ڕۆژئاوای كوردستان ڕایدەگەیەنێت، سزادانی دوو گروپی پەیوەندیدار بە توركیا، گۆڕانكاری دیمۆگرافی ڕاناگرێت، چونكە گۆڕانكاری دیمۆگرافی لە عەفرین لەسەر دەستی دەوڵەتی توركیا ڕوودەدات، داواش دەكات لایەنە كوردییەكان هەڵوێستیان لەبەرامبەر رەوشی عەفرین هەبێت، بەلایەنی كەمەوە نووسینگەكانی سەر بەئەنەكەسە و رێكخراوی خێرخوازی بارزانی لەوێ نەكرێنەوە، چونكە ئەوە پاساوهێنانەوەیە بۆ داگیركاری عەفرین.

دوێنێ وەزارەتی خەزێنەی ئەمریكا سزای بەسەر دوو گروپی چەكداری سەر بە دەوڵەتی توركیا بە ناوەكانی لیوای سلێمان شا و یەكەی هەمزەدا سەپاند. هەروەها بەرپرسانی ئەو گروپانە بەناوەكانی محەمەد حوسێن جاسم (ئەبو ئیمشە) و وەلید حوسێن جاسم و سەیف ئەبوبەكر لەلایەن ئەمریكاوە سزایان بەسەردا سەپێندرا.

وەزارەتەكە لە ڕاگەیەندراوەكەیدا ئاماژەی بەوەكردووە، ئەو گروپانە كردەوەی دژە مرۆیییان بەرامبەر بە هاوڵاتیانی مەدەنی كورد و ئێزدی لە عەفرین ئەنجامداوە.

ئەم دوو گروپە بە سەرپەرشتی سوپای نیشتیمانی سوریا  و میتی توركیا كاردەكەن.

ساڵح موسلیم، هاوسەرۆكی پارتی یەكێتی دیموكرات (پەیەدە) لەلێدوانێكی تایبەتدا بۆ شارپرێس دەڵێت "ئەم بڕیارەی ئەمریكا بەرامبەر بە گروپەكانی دەوڵەتی توركیا ڕەمزییە، چونكە تەنها ناوی ئەو دوو گروپە دانراون لەسەر لیستی سزاكان، بەڵام گروپی زۆر هەن، وەك ئەحرار شەرقییە و هیدیكەش، كە هەموویان بەرهەمی داعشن و لە عەفرین كۆبوونەتەوە".

ساڵح موسلیم ئاماژەی بەوەدا كە ئەم بڕیارەی ئەمریكا هەنگاوێكی باشە، بەڵام بەس نییە، چونكە هەنگاوێكی بچووكە، دەوڵەتی توركیا لەپشت ئەم چەكدارانەوەیە كە هەموویان كۆنترۆڵ دەكات.

موسلیم لە درێژەی قسەكانیدا گوتی "تەنها بە كشانەوەی توركیا لە عەفرین، ئەم شارە لە گروپە چەكدارەكان رزگاری دەبێت، ئێستا دەوڵەتی توركیا هەر لەوێیە، ئەو خەڵكە لە ژێر ناوێكی دیكەدا كۆدەبنەوە و جارێكی دیكە خۆیان ڕێكدەخەنەوە و بەردەوام دەبن لە سیاسەتەكانیان".

موسلیم ڕاپۆرتە ئەمریكییەكەی وەبیرهێنایەوە كە "دەڵێت ئەو گروپانە كردەوەی دژە مرۆڤایەتییان لە عەفرین ئەنجامداوە" و ئاماژەی بەوەدا كە كردەوەی چەكدارەكانی توركیا زۆر زیاترە لە كردەوەی دژە مرۆڤایەتی و ئاماژەی بە گۆڕانی دیمۆگرافی كرد، "ئێستا گۆڕانكاری دیمۆگرافی ڕوودەدا لە عەفرین، تەنها ئەم باندانەش نین كە دەبنە هۆی گۆڕانكاری دیمۆگرافی، چونكە چەندین گروپی دیكەی پەیوەندیدار بە توركیا لە عەفرین هەن، گۆڕانكاری دیمۆگرافیش لەلایەن ئەوانەوە دەكرێت. گەمارۆكانی سەر ئەو گروپانە گۆڕانكاریی دیمۆگرافی ڕاناگرێت، تا توركیا مابێت گۆڕانكاری دیمۆگرافی بەردەوام دەبێت، واتە گۆڕانكاری دیمۆگرافی لەلایەن خودی دەوڵەتی توركیاوە ئەنجام دەدرێت".

هەروەها هاوسەرۆكی پەیەدە ئەوەشی خستەڕوو "لەم چوارچێوەیەدا كوێت و قەتەر و رێكخراوە ئیخوانییەكان لە عەفرین لە ژێر چاودێری دەوڵەتی توركیا، خۆیان گوند دروست دەكەن، ئەمە گۆڕانكارییەكی دیمۆگرافییە".

ساڵح موسلیم لەبارەی هەڵوێستی لایەنە كوردییەكان دەڵێت "پێویستە لایەنە سیاسییەكانی كورد ئاگاداری ئەو كارانەبن، لەناو ئەم گۆڕانكاریی دیمۆگرافییە و كۆچكردنی زیاتر لە 300 هەزار كوردانی عەفرین، هێشتا لایەنە كوردییەكان هەن كە هەوڵی كردنەوەی نووسینگەكانیان دەدەن لە عەفرین، كردنەوەی نووسینگەی لایەنە سیاسییەكانی سەر بە (ئەنەكەسە) و كردنەوەی نووسینگەی رێكخراوی خێرخوازی بارزانی لە عەفرین بە مانای پاساوهێنانەوەیە بۆ داگیركاریی لە عەفرین".

جەختیشیكردەوە، ئەوان وەكو پەیەنەكە زۆرجار بە لێدوان سەرنجیان بۆ ئەم پرسە ڕاكێشاوە، پێویستە كورد هەنگاو بنێت پێویستە گوێیان لێ بگیرێت بۆ ڕێگریكردن لە داگیركاری توركیا لە عەفرین.