وتەبێژی حکومەتی عێراق ڕایدەگەیەنێت، دڵنیابوونی هاووڵاتییان لە هەرێمی کوردستان و وەرگرتنی مووچەکانیان بە بەردەوامی، سەقامگیری بەدوای خۆیدا دەهێنێت و حکومەتی عێراقیش بەدوای ئەو سەقامگیرییەدا دەگەڕێت.
باسم عەوادی، وتەبێژی حکومەتی عێراق لەبارەی ئەوەی دوای کۆبوونەوەی بایدن و سوودانی ئایا دەست بە هەناردەکردنەوەی نەوتی کوردستان دەکەنەوە، دەڵێت: "بەڵێ بە دڵنیاییەوە".
وتەبێژی حکومەتی عێراق ڕاشیگەیاند، "پتەوکردنی پەیوەندییەکانیش لەنێوان حکومەتی ناوەندی لە بەغدا و حکومەتی هەرێمی کوردستان بە هەمان شێوە کاری لەپێشینەیە. سەقامگیریی هەرێمی کوردستان سەقامگیریی عێراق و بەغدایە و بەپێچەوانەشەوە"
وەکو عەوادی باسی دەکات، گەشەسەندنی هەرێمی کوردستان "رەنگدانەوەی ئەرێنی دەبێت لەسەر تەواوی پارێزگاکانی عێراق و دڵنیابوونی هاووڵاتییان لە هەرێمی کوردستان و وەرگرتنی مووچەکانیان بە بەردەوامی، بە هەمان شێوە سەقامگیری بەدوای خۆیدا دەهێنێت و حکومەتی عێراقیش بەدوای ئەو سەقامگیرییەدا دەگەڕێت".