شارپرێس:
ئەمرۆ، نوری مالیكی، سەرۆکی هاوپەیمانی دەوڵەتی یاسا، لەگەڵ نێردەی تایبەتی ئەمریکا بۆ سوریا كۆبووەوە، نوسینگەی مالیكی ناوەڕۆكی كۆبونەوەی ئاشكراكردوەو دەڵێت،" پشتیوانیکردنی پڕۆسەی دیموکراسی و پاراستنی سەروەریی وڵات تاوتوێكراوە".
نوسینگەی مالیکی لەڕاگەیەنراوێکدا ئاماژەی بەوەدا، لەدیدارەکەدا پەرەسەندنەکانی دۆخی سیاسی لەعێراق و شایستە نیشتمانییەکانی داهاتوو تاوتوێ کران.
سەرۆکی دەوڵەتی یاسا جەختی لەگرنگیی پشتیوانیکردنی ڕەوتی دیموکراسی و پتەوکردنی سەقامگیریی سیاسی کردەوە، هاوکات دوپاتی کردەوە لەسەر پێویستیی رێزگرتن لەسەروەریی عێراق و بژاردەکانی گەلەکەی.
هەر لەدیدارەکەدا جەخت کرایەوە لەسەر بەردەوامیی پەیوەندی و هەماهەنگیی نێوان هەردولا لەو دۆسیانەی کە جێی بایەخی هاوبەشن.
لەبەرانبەردا، تۆم باراك ئاماژەی بەگرنگیی ئەو ڕۆڵە کرد کە عێراق دەیگێڕێت لەرێڕەوی چارەکردنی کێشەکانی ناوچەکە، لەگەڵ کەمکردنەوەی توندیی ململانێکان، پشتیوانیکردنی دیالۆگ و بەرەنگاربونەوەی تیرۆر.