شارپرێس:
لەکاتێکدا عێراق لەبەردەم کۆمەڵێک تەحەدای گەورەی ئەمنیدایە، دەنگە ناڕەزایەتییە سیاسییەکان دژی لەشکرکێشیو بەردەوامیی پێشێلکارییەکانی سوپای تورکیا لەناوخۆی خاکەکەیدا بەتوندی بەرزدەبنەوە، چاودێرانو پەرلەمانتاران هۆشداریدەدەن کە ئەم دۆخە نەخوازراوە بەزاندنی ئاشکرای یاسا نێودەوڵەتییەکانەو پێویستی بەهەڵوێستێکی توندترو یەکلاکەرەوەی حکومەتی بەغدا هەیە بۆ پاراستنی سەربەخۆیی بڕیاری نیشتمانی.
پێشێلکردنی یاسا نێودەوڵەتییەکانو هاوار لەسەر سنورەکان
یاسر ئیسکەندەر وتوت ئەندامی پەرلەمانی عێراق لەلێدوانێکی توندى ڕۆژنامهوانیدا ڕایگەیاند، ئۆپەراسیۆنە سەربازییە یەک لەدوای یەکەکانی تورکیا لەناوخاکی عێراقدا، پێشێلکارییەکی ڕونو ئاشکرای هەموو نەریتو یاسا نێودەوڵەتییەکانە.
وتوت جەختیکردوهتهوه، بەردەوامیی ئەم پێشێلکاریانە پێویستی بەجوڵهیهكى خێرای دیپلۆماسیو حکومی هەیە بۆ پاراستنی هاوڵاتیانی بێتاوان لەناوچە سنورییەکان، کە ڕۆژانە باجی ئەم شەڕە نەبڕاوەیە دەدەن، ئەو دەڵێت، "عێراق مافی تەواوی خۆیەتی بەرگریی لەسەروەرییەکەی بکات؛ بێدەنگی لەمباریەوە تەنها ڕێگه بۆ پێشێلکاریی زیاتر خۆشدەکات."
سەربازگەی زێلکان؛ خەنجەرێک لەسەر پشتی موسڵ
لەلایەکی دیکەوە، مەترسییەکان تەنها لەسەر هێڵە سنورییەکان نەماونەتەوە، بەڵکو گەیشتونەتە قووڵایی خاکی عێراق، لهو ڕوهشهوه زوهێر چەلەبی ئەندامی هاوپەیمانی دەوڵەتی یاسا هۆشدارییەکی توند لەسەر بونی هێزەکانی تورکیا لەههرێمى كوردستان دەدات بەتایبەت سەربازگەی زێلکان له(باشیك) کە تەنها 15 کیلۆمەتر لەسەنتەری شاری موسڵەوە دورە ناوهندى پارێزگاى نهینهواوه دوره.
چەلەبی ئاماژەی بەوەکرد، ئەم سەربازگەیە لەبنکەیەکی کاتییەوە گۆڕاوە بۆ ناوەندێکی پێشکەوتوی هێرشبەری سوپای تورکیا.
ئەو ڕەخنەی توندی لەدەستێوەردانە دەرەکییەکان گرت کە کاریگەرییان لەسەر بڕیاری سیاسیی عێراقو تەنانەت دابەشکردنی پۆستە حکومییەکانیش دروستکردوە، ئهو دهڵێت، "ملکەچبون بۆ ئەم فشارانە، زیانی گەورە لەبەرژەوەندییەکانی گەلی عێراق دەدات."
دەرئەنجامو ڕێگهچارەکان
مانەوەی دۆسیەی بونی سەربازیی تورکیا بەبێ چارەسەری ڕیشەیی، نەک هەر سەروەریی عێراق دەخاتە ژێر پرسیارەوە، بەڵکو ئاسایشی ناوخۆییو سەقامگیریی کۆمەڵایەتیش تێکدەدات.
سهرچاوهكان دهڵێن، "بونی سەربازیی تورکیا لەعێراق لەقۆناغی بۆردومانی ئاسمانییهوه تێپەڕیوە، لەڕوی واقیعییەوە، دروستکردنی کەرتی سەربازیی بەرفراوان، تۆڕی ڕێگهوبانو مانەوەی درێژخایەنی هەزاران سەرباز، دۆخەکەی گەیاندوەتە داگیرکارییەکی سەربازیی سنوردارو دیفاکتۆ لەناوچە شاخاوییەکاندا، تەنانەت ئەگەر لەڕوی یاساییو دیپلۆماسییەوە بەهۆی ڕێککەوتنە ئەمنییە نوێیەکانی نێوان بەغداو ئەنكەرەوە داپۆشرابێت".
ئێستا تورکیا زیاتر لە 100 بۆ 136 پێگەو سەربازگەی جێگیری لەناو خاکی ههرێمى كوردستاندا دروستکردوە، دروستکردنی تۆڕی ڕێگاوبانی سەربازی بەقووڵایی 40 کیلۆمەتر، لای لایەنە شیعەکان وەک سەپاندنی ئەمری واقیعو لێسەندنەوەی کۆنترۆڵی خاک لەحکومەتی فیدراڵ لێکدەدرێتەوە.
لایەنە سیاسییەکان کۆکن لەسەرئەوەی، عێراق پێویستی بەگوتارێکی یەکگرتوی نیشتمانیو فشارێکی ڕاستەقینەی ئابورییو دیپلۆماسی هەیە تاوەکو ڕێگریی لەهەر جۆرە دەستێوەردانێک بگرێت کە زیان بەشکۆی دەوڵەت بگەیەنێت.
