شارپرێس:

ژوری بازرگانی هەولێر داوا لە حکومەتی عێراق و لایەنە پەیوەندیدارەکان دەکات بەزوترین کات پێداچونەوە بە بڕیاری گۆڕینی نرخی دراودا بکەن و دەڵێت، پێویستە بارگرانی لەسەر بازاڕ و هاوڵاتییان کەمبکرێتەوە.

ژووری بازرگانی و پیشەسازیی هەولێر لەڕاگەیەنراوێکدا دەڵێت،" وەك داکۆکیکار لە ماف و بەرژەوەندییە ئابورییەکانی توێژی بازرگانان، خاوەنکاران و کەرتی تایبەت، نیگەرانیی قوڵی خۆی بەرامبەر بەو بڕیارانەی حکومەتی عێراق دەربڕین کە پەیوەندیدارن بە بەرزبوونەوەی نرخی دۆلار و دروستبونی ناگیرساندنەوە و فشار لەسەر بەهای دراو و بژێویی هاوڵاتییان ".

ئەوەشیخستەڕوو،" ئەم جۆرە بڕیارە ئابورییە ناهاوسەنگانە، راستەوخۆ دەبنە هۆی تێکدانی هاوسەنگیی بازاڕ، پەکخستنی جوڵەی بازرگانی، هەڵکشانی نرخی کاڵا و پێداویستییە سەرەکییەکان، قورسکردنی باری گوزەرانی هاوڵاتییان بە گشتی و چینی کەمدرامەت بە تایبەتی، هاوکات، ئاستەنگی گەورە لە بەردەم وەبەرهێنەران و خاوەن کۆمپانیاکان دروست دەکات لە جێبەجێکردنی گرێبەستەکان و پلانی ستراتیژیی کارکردنیان".

ژوری بازرگانیی هەولێر، جەخت لەسەر ئەوە دەکاتەوە کە چارەسەرکردنی قەیرانە ئابورییەکان بە سەپاندنی بڕیاری نەرێنی لەسەر شانی کەرتی تایبەت و بازرگانان و هاوڵاتیان نایەتە ئاراوە، دەشلێت، پێویستە حکومەتی فیدراڵ سیاسەتێکی نەرمتر و زانستیتر پەیڕەو بکات کە پارێزگاری لە بەهای دراو و سەقامگیریی بازاڕ بکات.