هیندستان هەڵوێستى خۆى لەسەر کڕینى نەوتى ئێران راگەیاند

جیهان

07/06/2019‌ 3084 جار خوێندراوه‌ته‌وه

شارپرێس:

راویش کۆمار وتەبێژی وەزارەتی دەرەوەی هیندستان رایگەیاند کە وڵاتەکەی لەسەر کڕینی نەوتی ئێران بەگوێرەی ئاسایشی وزە و پێداویستییە ئابوورییەکانی وڵاتەکەی بڕیار دەدات .


رۆژنامەی "ئەشین ئیچ" لەسەر زاری وتەبێژی وەزارەتی دەرەوەی هیندستان گواستوویەتییەوە کە گوتوویەتی هەڵوێستی هیندستان نەگۆڕاوە و  وڵاتەکەی هەر بڕیارێک بدات لەسەر بنەمای ئاسایشی وزە و رەچاوکردنی بازرگانی و بەرژەوەندییە نیشتیمانییەکان دەبێت .


رۆژی پێنجشەممە کۆبوونەوەیەکی بەپەلە لەنێوان وەزیرانی ناوخۆ و دەرەوە و وەزیری نەوت بەڕێوەچوو بۆ بڕیاردان لەسەر هاوردەکردنی نەوت و گاز لەدەرەوە ، کە لە کۆبوونەوەکەدا بەرپرسانی هەردوو کۆمپانیای نەوتیی  "هیندی" و "بی بی سی ئێڵ"  بەشدار بوون .


ئەو بەرپرسە هیندیانەی ئاگاداری کۆبوونەوەکە بوون باسیان لەوە کردووە کە کۆبوونەوەکە تایبەت بووە بە بڕیاردان لەسەر هاوردەکردنی نەوتی ئێرانی و وڵاتانی تر و وەبەرهێنان لە یەدەگەکانی نەوتی هیندستان .


هەفتەی پێشووتر بەرپرسانی هیندستان باسیان لەوە کرد کە حکوومەتی نوێی هیندستان هەوڵ دەدات بەخێرایی لەگەڵ لایەنی ئێرانی دەست بە گفتوگۆ بکات بۆ دەستپێکردنەوە بە هاوردەکردنی نەوتی ئێران و  دانەوەی نرخی نەوتی کڕدراو لە ئێران بە دراوی رۆبڵی هیندی لەجیاتی دۆلار بۆ دەرباز بوون لە گەمارۆکانی ئەمەریکا بۆسەر ئەو وڵاتە.

و. ئاکۆ عەبدوڵلا ئاڵی