شارپرێس : ئاکۆ عەبدوڵلا ئاڵی
سەرۆکی پارتی گەلی کۆماری ئۆپۆزیسیۆن لە تورکیا دەڵێت دەبێت حکوومەت لە سیاسەتی دەرەوەدا خۆی لەسەرکەشیکردن بەدوور بگرێت ، ئەوەش وەک ئاماژەیەک بۆ بڕیاری رەجەب تەیب ئەردۆغان بۆ دەستدرێژیکردنە سەررۆژئاوای کوردستان .

لەلێدوانێکی رۆژنامەوانیدا کەمال کڵچدار ئۆغڵو سەرۆکی پارتی گەلی کۆماری ئۆپۆزیسیۆن گوتی بەهۆی ڕێزنەگرتن لە سەلامەتی هەرێمیی خاکی سوریا ، ئەردۆغان وایکردووە هەموو جیهان لەدژی تورکیا یەکبگرن .

بەگوێرەی میدیاکانی تورکیا ئۆغڵو گوتوویەتی " دەبێت لە سیاسەتی دەرەوەدا خۆمان لە سەرکەشیکردن بەدوور بگرین ، ئەگەر ڕێز لە سەلامەتی هەرێمیی خاکی وڵاتانی تر نەگرین ئەوە دوژمن بۆخۆمان درووست دەکەین ، بۆیە ئێستا هەموو جیهانمان لەخۆمان کردۆتە دوژمن ".

سەرۆکی جەگەپە ئاماژەی بۆ ئەوە کرد کە حکوومەتی ئەنقەرە بەنهێنی توندڕەوە بریندارەکان لە سوریاوە بۆ چارەسەرکردن دێنێتە تورکیا و جارێکی تر رەوانەی سوریایان دەکاتەوە".

دوای دەستپێکردنی دەستدرێژییەکانی تورکیا بۆسەر رۆژئاوای کوردستان  و باکووری سوریا ، زۆرینەوەی وڵاتانی جیهان سەرکۆنەی هێرشەکەی تورکیایان کرد و داوایان لە ئەنقەرە کرد هێرشەکانی رابگرێت .

لەبەرانبەردا ئەردۆغان جەختی کردۆتەوە کە تا بەدیهێنانی ئەو ئامانجەی لەپێناویدا پرۆسە سەربازییەکەی دەستپێکردووە هێرشەکان راناگرێت .