شارپرێس:
عومەر گوڵپی ئەندامی پەرلەمانی کوردستان ڕایدەگەیەنێت، "هەموو ڕێکارەکان دەگرینەبەر، فشار دەکەین، ماندوو نابین، تائەوکاتەی سامانی نەوت میللی دەکرێت‌و دەبێتەوە بەموڵکی خەڵک‌و بەیاسا مامەڵەی لەگەڵ دەکرێت".
لەنوسینێکدا بەناونیشانی "بۆچی بەوەڵامەکان ڕازی‌نەبووم؟" عومەر گوڵپی، ئەندامی فراکسیۆنی کۆمەڵی دادگەری لەپەرلەمانی کوردستان ڕایدەگەیەنێت "هەموو ڕێکارەکان دەگرینەبەر، فشاردەکەین، تا ئەو کاتەی سامانی نەوت میللی دەکرێت‌و دەبێتەوە بەموڵکی خەڵک‌و بەیاسا مامەڵەی لەگەڵ دەکرێت".
ده‌شڵێت:"ئەگەر وەزیری سامانە سروشتیەکان (کە وەزیرێکی نوێیەو دەرفەتمان پێداوە تا جێگیر دەبێت لەکارەکەی) سوربێت لەسەر وەڵامنەدانەوە، بەپێی یاسا دەچینە قۆناغی پرساندن‌و ڕێکاری تری یاسایی بەرامبەری‌‌و ئەو ئەرکەى لەسەرشانمانە وەک نوێنەری خەڵک جێبەجێی دەکەین".
دەقی نوسینەکەی عومەر گوڵپی
بۆچی بە وەڵامەکان ڕازی نەبووم؟
(ڕوونکردنەوەیەک بۆ ڕایگشتی)
لە ڕوانگەی بڕوای تەواومان بەوەی نەوت سامانێکی نیشتیمانیەو ئەبێت داهاتەکەی بۆ خەڵکی کوردستان بێت‌و سەرجەم پڕۆسەی بەڕێوەبردنی(دۆزینەوە، دەرهێنان، گواستنەوە، فرۆشتن‌و گەڕانەوەی داهات)ەکەی بەپێی سیستم‌و یاسا بەرکارەکان بێت‌و بەرژەوەندی باڵای خەڵک تێیایدا پارێزراوبێت، بە ژمارەکانی (٧، ٨، ٣٧، ٣٨، ٤٥، ٥٠، ٦٥، ٦٧، ٧٢، ٧٧، ٨٨، ٩٧) لەماوەی حەوت مانگی ڕابردوودا، کە ئەکاتە (١٢)جار، بەدواداچوونم بۆ ئەم داهاتە گرنگە کردووە، زۆرینەی وەڵامەکانیش بڕوا پێهێن نەبوون، هەربۆیە بەردەوام بووین لە بەدواداچوون.
سەبارەت بە وەڵامی پێنج پرسیاری گرنگ لەسەر نەوت، بەڕێز وەزیری سامانە سروشتیەکان، بە نووسراوی ژمارە (٣٦٣٠) لە بەرواری(٢٥ی ٤ی ٢٠٢١) کە بە نووسراوی ژمارە (ک/٤٥) لە بەرواری(٢ی ٥ی ٢٠٢١)ی پەرلەمانی کوردستان بەدەستمان گەیشت، وەڵامی داینەوە، پوختەى ناوەڕۆکی وەڵامەکەی بەمجۆرەبوو:" لە ڕاپۆرتەکانی دیلۆیت زانیاریی هەیە، پرسیارەکان ئاراستەی ئەنجومەنی هەرێمی نەوت‌و گاز بکەن"، ئەم وەڵامەش بە تەواوەتی ڕەتکراوەیە لاى ئێمە، چونکە پێچەوانەی حوکمەکانی هەردوو یاسای ژمارە (٢١)ى وەزارەتی سامانە سروشتیەکان‌و (٢٢)ى ساڵى (٢٠٠٧)ى نەوت‌و گازی هەرێم و بنەما دەستورییەکان‌و بنەما ژمێریارییەکانە، ئەمە سەرەڕای ئەوەی هێندەی ئاگاداربم ئەنجومەنى هەرێمى نەوت و گاز زیاتر لە ساڵێکە کۆبوونەوەی ئەنجام نەداوەو تووشی شەلەل بووە، کۆمپانیاى دیلۆیتیش هیچ نییە بێجگە لە ماکیاجى پرۆسەى ناشەفافى نەوت و زۆربەى کات دواى یەک ساڵ ڕاپۆرت بڵاو دەکاتەوە.
هەربۆیە بە ژمارە (١٠١) لە بەرواری (٧ی ٦ی ٢٠٢١) وەڵامەکەمان ڕەتکردەوەو دووبارە پرسیارە گرنگەکانمان ئاراستە کردنەوە، چونکە بە پێی یاساو بنەما دەسورییەکان وەزیری سامانە سروشتیەکان‌و وەزارەتەکەی بەرپرسیاری پرۆسەی دەرهێنان‌و فرۆشتنی نەوت‌و گازن.
ئێمە کێشەی شەخسیمان لەگەڵ وەزیری سامانە سروشتیەکان‌و هیچ وەزیرێکی حکومەت‌و سەرۆک‌و جێگرى سەرۆکى حکومەت نییە، تەنهاو تەنها کێشەی ئێمە لەگەڵیان لەسەر جێبەجێکردنی یاسا، بەدامەزراوەییکردنی حکومەت‌و پاراستنی موڵک‌و ماڵی گشتیە، ئێمە دەمانەوێت وەزارەتی سامانە سروشتیەکان وەزارەت بێت نەوەک جانتای دەستی کەسێک، ئێمە پێمان وایە نەوت سامانی خەڵکی ئەم وڵاتەو نەوەکانی داهاتووەو ئەبێت هەموو پرۆسەکەی ڕوون بێت‌و بەپێی یاسا بێت‌و لە ژێر چاودێری تەواودا بێت‌و بۆ بەرژەوەندی خەڵک بێت، بەڵام ئەوان بە هەڵس‌و کەوتیان لەگەڵ نەوت‌و داهاتەکەی ئەوەیان سەلماندووە کە نەوت موڵکی خەڵک نییەو بەردەوامن لە پێشێلکاری، کە ئەنجامەکەی دەوڵەمەندبوونی کۆمپانیای حزبەکانی دەسەڵات‌و زیادبوونی سەرمایەی بەرپرسەکانیان بووە.
هەموو ڕێکارەکان دەگرینە بەر، فشار دەکەین، ماندوو نابین، تا ئەو کاتەی سامانی نەوت میللی دەکرێت‌و دەبێتەوە بە موڵکی خەڵک‌و بە یاسا مامەڵەی لەگەڵ دەکرێت، ئەگەر بەڕێز وەزیری سامانە سروشتیەکان (کە وەزیرێکی نوییەو دەرفەتمان پێداوە تا جێگیر دەبێت لە کارەکەی) سوربێت لەسەر وەڵام نەدانەوەی بە پێی یاسا، ئەوە دەچینە قۆناغی پرساندن‌و ڕێکاری تری یاسایی بەرانبەریی، و ئەو ئەرکەى لەسەرشانمانە وەک نوێنەری خەڵک جێبەجێی دەکەین.
لەگەڵ ڕێزدا
عومەر گوڵپی
ئەندامی لیژنەی دارایی لە پەرلەمانی کوردستان
١٠ی ٦ی ٢٠٢١
