شارپرێس
ناوەندی ڕاگەیاندن و چاپەمەنیی هێزەکانی پاراستنی گەل-هەپەگە ڕایگەیاند، گەریلاکانیان لە ئاڤاشین چالاکیی بەزەبریان دژی سوپای تورکیا ئەنجامداوە و بەلایەنیکەمەوە لەو چالاکییەدا سێ سەربازی سوپای توركیا كوژراون.
ناوەندی ڕاگەیاندن و چاپەمەنیی هێزەکانی پاراستنی گەل-هەپەگە ئاماری دوو ڕۆژی ڕابردووی شەڕوو پێكدادانەكانیانی لەگەڵ سوپای توركیا بڵاوكردەوە و ڕایگەیاند، گەریلاکان لە چوارچێوەی هەڵمەتی شۆڕشگێڕیی هەڵۆکانی زاگرۆسدا ڕۆژی ١١ی تشرینی یەکەم کاتژمێر ٠٩:٠٠ لە قەڵای بەدەوێ چالاکییان لەدژی سەنگەرێکی تۆپهاوێژی سوپای توركیا ئەنجامداوە، لە ئەنجامدا سێ سەرباز كوژراون و چەکێکی تۆپهاوێژ و سەنگەرەکەش خاپوورکراون.
هەپەگە ئاماژەی بەوەشکردووە، کە ئەو چالاکییە بۆ یادکردنەوەی شەهید جومالی چۆروم ئەنجامدرا، کە بەهۆی هێرشی چەکی کیمیاییەوە شەهیدبووە و هەروەها بۆ تۆڵەی شەهیدانی وەرخەل-یش بووە.
لە بەشێکی دیکەی ڕاگەیەندراوەکەی هەپەگەدا هاتووە، فڕۆکە جەنگییەکانی توركیا ڕۆژانی ١١ و ١٢ی تشرینی یەکەمی ٢٠٢١ پێنج جار ناوچەکانی چیای ڕەش، دۆڵی هەڤاڵ جومعە، چەمی لۆلان، سنین، گردی مۆزەلا و ناوچەی وەرخەل بۆردوومانکردووە.
س.س