شارپرێس:

میدیاکانی تورکیا بڵاویانکردۆتەوە کە دەسەڵاتدارانی تورکیا سزایەکی توندی بەپرسی پێشووی یەکەی بەرەنگاربوونەوەی قاچاخچێتیی و تاوانی ڕێکخراوی ئەو وڵاتەیانداوە، ئەویش بەهۆی ئەوەی لەلێدوانێکدا پشتیوانیی و هاوسۆزیی خۆی بۆ سەڵاحەددین دەمیرتاشی هاوسەرۆکی پێشووی پارتی دیموکراتی گەلان (هەدەپە) دەربڕیوە.

حەنەفی ئاڤچی سەرۆکی پێشووی  یەکەی بەرەنگاربوونەوەی قاچاخچێتیی و تاوانی ڕێکخراوی تورکیا لەلوێدوانێکدا رایگەیاندووە کە پێویستە گوێ لە بڕیاری دادگای مافی مرۆڤی ئەوروپا لەبارەی پێویستی ئازادکردنی سەڵاحەددین دەمیرتاشەوە بگیرێت و دەستبەجێ ناوبراو ئازاد بکرێت، ئەمەش دەسەڵاتدارانی تورکیای تووڕەکردووە .

باس لەوەشکراوە کە بەهۆی ئەو لێدوانەوە دەسەڵاتدارانی تورکیا بڕیاریانداوە ئاڤچی لە پلە ئەمنییەکەی دابماڵرێت و چەک و ناسنامەکەشی لێوەربگیرێتەوە، بەراددەیەک بەهیچ شێوەیەک ڕێگەشی نەدراوە ناوبراو بەرگریی لە خۆی بکات و تەنیا لە بڕیارەکە ئاگادار کراوەتەوە.

پێشتریش دەسەڵاتدارانی تورکیا سەبری ئۆزۆنی سەرۆکی یەکەی هەواڵگریی میتیان لە پۆستەکەی دوورخستبۆوە و پلە ئەمنیی و چەک و ناسنامەکەیان لێوەرگرتبۆوە، ئەوەش بەهۆی ئەوەی لە تویتێکدا پشتیوانیی جینان کەفتانچی ئۆغڵووی سەرۆکی لقی شاری ئەستنەبووڵی پارتی گەلی کۆماریی (جەهەپە)ی کردبوو کە بەبڕیاری دادگا بڕیاری زیندانیکردنی بۆ دەرچووبوو.
ئامادەکردن: ئاکۆ ئاڵی