شارپرێس
سەرۆكی نوێنەرایەتیی حكومەتی هەرێمی كوردستان داوای جێبەجێكردنی ڕێكەوتننامەی شەنگال لە وەزیری كۆچ و كۆچبەرانی عێراق دەكات.

فارس عیسا، سەرۆكی نوێنەرایەتیی حكومەتی هەرێمی كوردستان لە بەغدا، سەردانی ئیڤان فائق جابرو، وەزیری كۆچ و كۆچبەرانی عێراقی كرد و لەبارەی مەبەستی سەردانەكەی لە پەیجی خۆی لە فەیسبوك نوسیویەتی: جێبەجێكردنی ڕێكەوتننامەی شەنگال تەوەرێكی دیكەی دیدارەكە بووە.

سەرۆكی نوێنەرایەتی حكومەتی هەرێم لە دیدارەكەیدا لەگەڵ وەزیری كۆچ و كۆچبەران جەختیكردووەتەوە، لەسەر زەرورەتی وەگەڕخستنی هەوڵ و تەقالاكان و كاری هاوبەش، لەپێناو جێبەجێكردنی ڕێكەوتننامەی شەنگال و بەرقەراركردنی ئاسایش و سەقامگیری بۆ ناوچەكە و گەڕاندنەوەی ئاوارەكان بۆ ناوچەكانیان.

لەبەرامبەردا، وەزیری كۆچ و كۆچبەرانی عێراق جەختی لەسەر زەرورەتی جێبەجێكردنی ڕێكەوتننامەی شەنگال كردەوە و بەڵێنیشی دا، هەوڵی چارەسەركردنی كێشە و گرفتەكانی ئاوارەكان و دابینكردنی پێداویستییەكانیان بدات و كاری جددیش بكات بۆ گەڕاندنەوەیان بۆ ناوچەكانی خۆیان.

دوو ساڵ لەمەوبەر، حكومەتی هەرێم و عێراق ڕێككەوتنامەی شەنگاليان واژۆكرد و بەپێی ڕێككەوتنەكە، قایمقامێكی نوێ بۆ شەنگال دادەنرێتت و ئیدارەی قەزاكە دەدرێتە دەست حكومەتی عێراقەوە و ئەو هێزانەی ئێستا لە شەنگالن و بە نزیك لە پەكەكە ناودەبرَێن، لە شەنگال دەكرێنە دەرەوە.
س.س