سبه‌ینێ باران‌و ته‌رزه‌و هه‌وره‌ بروسكه‌یه‌

کوردستان

05/03/2024‌ 742 جار خوێندراوه‌ته‌وه

شارپرێس:

به‌گوێره‌ى ئه‌و زانیاریانه‌ى شاره‌زایه‌كى بوارى كه‌شناسى ئاشكرایكردوه‌، سبەینێ چوارشەممە شەپۆلێکی بارانبارین ناوچە جیاوازەکانی هەرێمى كوردستان دەگرێتەوە، ده‌شڵێت:"تەرزەو هەورە بروسکەشی لەگەڵ دەبێت".


ئاراس جەبار شارەزای کەشناسی ئاشكرایكردوه‌، لەئێوارەی سبه‌ینێ چوارشەممەوە، بارانبارین لەناوچەکانی پارێزگای دهۆک دەستپێدەکات‌و ڕێژەی بارانەکە لەناوچە شاخاوییەکانی پارێزگاکە زیاتردەبێت‌و هەندێک کات هەورە بروسکە چالاک دەبێت لەگەڵ بارینی تەرزە.

وتویه‌تى:"کاریگەری ناسەقامگیریی کەشوهەوا ناوچە شاخاویەکانی پارێزگای ھەولێر دەگرێتەوە بەڕێژەیەکی مامناوەندو بەفر لەناوچە شاخاویەکانداو بارانی پێشبینیکراو (10 بۆ 25)ملیمەتر دەبارێت".

له‌باره‌ى كه‌شوهه‌واى (سلێمانی، هەڵەبجە، کەرکوک، ئیدارەکانی گەرمیان‌و ڕاپەڕین)یشه‌وه‌ ئاشكرایكردوه‌، بەگشتی حاڵەتەکە لاواز دەبێت‌و لەکاتەکانی شەودا لەهەندێک کات‌و شوێن هەورەبروسکە چالاک دەبێت لەگەڵ تاوە بارانی کورت خایەن.

ئه‌وه‌شى وتوه‌، "ڕێژەی بارانی پێشبینیکراو بۆ ئەو ناوچانە دوو تا حەوت ملیممەترە، پلەکانی گەرما سبەینێ لەناوچە شاخاویەکاندا دوو تا سێ پلە نزمدەبێتەوەو لەبەشێک لەناوچەکان بەجێگیریی دەمێنتەوە".