پێداچوونەوەیەکی نوێی ڕێکخراوی تەندروستی جیهانی هەواڵێکی دڵنیاکەرەوەی راگەیاند سەبارەت بە پەیوەندیی لەنێوان زۆر بەکارهێنانی مۆبایل و زیادبوونی مەترسیی تووشبوون بە شێرپەنجەی مێشک. 

ڕێکخراوەکە رایگەیاندووە: بە پشتبەستن بە شیکارییەکی گشتگیر لە 63 توێژینەوە لە ساڵی 1994 تا 2022، داتاکان هیچ زیادبوونێکی حاڵەتەکانی شێرپەنجەی مێشکیان نیشان نەداوە کە پەیوەندییان بە بەکارهێنانی مۆبایلەوە هەیە، تەنانەت بۆ ئەو کەسانەی کە بە شێوەیەکی بەرفراوان یان بۆ ماوەیەکی زۆر بەکاریان هێناوە.

بەڵگەکانی ئێستا پشتڕاستی دەکەنەوە کە هیچ کاریگەرییەکی زیانبەخشی تیشکی مۆبایل لەسەر تەندرووستیی سەلمێنراو نییە، هەروەها ڕێکخراوی تەندروستی جیهانیش پێویستی لێکۆڵینەوەی زیاتری دووپاتکردووەتەوە بۆ ئەوەی هاوسەنگ بێت لەگەڵ پێشکەوتنە زانستییەکان.

 لە ئێستادا ئاژانسی نێودەوڵەتیی بۆ لێکۆڵینەوە لە شێرپەنجە،  تیشکی مۆبایلەکان بە "پێدەچێت شێرپەنجەیی" پۆلێن دەکات، واتە لێکۆڵینەوەی زیاتر پێویستە بۆ ئەوەی بە وردی پەیوەندییەکە دیاری بکرێت.

بڕیارە هەڵسەنگاندنە نوێیەکەی ڕێکخراوی تەندرووستیی جیهانی لە چارەکی یەکەمی ساڵی داهاتوودا بڵاوبکرێتەوە و ئەمەش ڕوونکردنەوەیەکی زیاتر لەسەر ئەو پرسە دەدات.
ئامادەکردن: ئاکۆ ئاڵی