سەرۆک وەزیرانی عێراق هۆشداریی دەدات لە هەڵکشانی دۆخی سیاسی و سەربازیی ناوچەکە و دەڵێت، ڕەتیدەکەینەوە ئاسمانی عێراق بۆ ململانێکان بەکاربهێندرێت.
بەگوێرەی ڕاگەیەنراوێکی نوسینگەی سودانی، لەمیانی پەیوەندییەکی تەلەفۆنیدا سودانی لەگەڵ ڤلادیمێر پۆتن، سەرۆکی ڕوسیا قسەیکردوە و باسیان لەوەکردوە، ئیدانەی بەکارهێنانی ئاسمانی عێراق لەلایەن ئیسرائیل و ئەمریکاوە دەکەین.
لەبەرامبەردا ڤلادیمێر پۆتن، هەڵوێستی بەغدای لەم دۆخەدا بەرز نرخاندوە و ئەویش ئیدانەی بەکارهێنانی ئاسمانی عێراقی کردوە، هاوکات سودانی بانگهێشت کردووە، بۆ بەشداریکردن لە لوتکەی ڕوسی-عەرەبی کە بەمزووانە لە مۆسکۆ ئەنجامدەدرێت.