شارپرێس:

به‌گوێره‌ى ڕاپۆرتێکی ڕۆژنامەی جمهوریەتی تورکی، شەپۆلێکی ناڕەزایەتی لەناو گەنجانی پارتی بزوتنەوەی نەتەوەیی (MHP) سەریهەڵداوە دژی پڕۆسەی ئاشتی لەگەڵ پەکەکە، ئەمەش دوای ئەوەی وه‌فدێكى پەرلەمانیی سەردانی عەبدوڵڵا ئۆجەلانیان کرد لەزیندانی ئیمڕاڵی.

ڕۆژنامەکە ئاشکرایکردوە، گەنجانی "گورگە بۆرەکان" باڵی چەکداری مەهەپەن، لەهەڵوێستی سەرکردایەتیی پارتەکەیان بەرامبەر بەپڕۆسەی چارەسەریی نیگەرانن، سەرەڕای ئەوەی دەوڵەت باخچەلی دەستپێشخەری بۆ چارەسەری کردوە، بەڵام لەزانکۆی ئەنكەرە گەنجانی نەتەوەپەرست دروشمی "ئۆجەلان لەسێدارە بدەن"یان بەرزکردەوە.

خوێندکارێکی ئەندامی ڕێکخستنەکە بەڕۆژنامەکەی وتوە، "ئۆجەلان تیرۆریستەو بانگەوازەکەی بۆ چەکدانان ڕاستییەکان ناگۆڕێت، باوەڕمان وایە ئۆجەلان ئاڕاستەی دەوڵەت دەکات نەک پێچەوانەکەی."

بەگوێرەی ڕاپۆرتەکە، ئەم نیگەرانی‌و سەرلێشێواوییە تەنها لەئەنكەرە نییە، بەڵکو لەناو زۆربەی گەنجانی نەتەوەپەرستی تورکیا بڵاوە کە پێیانوایە، پڕۆسەی تورکیای بێ تیرۆر بەئاراستەیەکی پێچەوانەی بیروباوەڕی ئەواندا دەڕوات.