شارپرێس:
سەرچاوەیەکی ئاگادار لە سوریا ڕۆژی یەکشەممە ئاشکرای کرد کە ئامادەکارییەکان بۆ گەڕانەوەی زیاتر لە ٨٥٠ عێراقی لە کەمپی هۆڵەوە بۆ عێراق لە ڕۆژی دووشەممەدا تەواو بووە، لە ژێر چاودێری هێزەکانی ئەمریکا.
ئەو سەرچاوەیە کە لە کەمپی هۆڵ کار دەکات، ڕایگەیاند، "هەموو ڕێکارە ئیداری و لۆجستیکییەکان بۆ گواستنەوەی گروپێکی نوێی عێراقی لە کەمپەکەوە بۆ عێراق تەواوبوون، کە سبەی بەیانی دەستپێدەکات".
ئاماژەی بەوەشکرد، "عێراق لە بەیانیدا زیاتر لە بیست پاس دەنێرێت بۆ خاکی سوریا لە ڕێگەی دەروازەی سنووری ئەلوەلید بۆ پارێزگای حەسەکەی ڕۆژئاوای کوردستان".
وەزارەتی کۆچ و کۆچبەرانی عێراق هەینی گەڕاندنەوەی بەشێکی دیکەی عێراقییەکانی لە کەمپی هۆڵ ڕاگەیاند، ئەم هەفتەیەش کاروانێکی تر دەگەڕێنەوە.
عەلی جەهانگیر وتەبێژی وەزارەتەکە ڕایگەیاند، نزیکەی سێ هەزار عێراقی لە کەمپەکەدا ماون و بە سێ کاروانی تر دەگوازرێنەوە، بە هەماهەنگی لەگەڵ نەتەوە یەکگرتووەکان، کە لەگەڵ بەغدا کاردەکەن بۆ کۆتاییهێنان بە بوونی هەر خێزانێکی عێراقی لە هۆڵ تا ساڵی ٢٠٢٧.
ئ.ح